旅人時光：小秘密一則
話說某年某日，當時的運動員男友的球隊請去旅行，連帶一位家人也可同行，我便拉住他衫尾跟住去。我問他地點將會是哪裏，「全部運動友，當然去陽光與海灘地方啦！好似係峇里。」他說。峇里有陽光海灘還有行山與激流，我們當然超開心，既然住宿交通三餐有人請，兌定多點印尼盾豪使都好。
起程啦！我們一行20幾人上機，個個興奮得嘈喧巴閉，一個又話去到要先「鋤大弟」，一個又說要先開場打波……在擾擾攘攘中，空中小姐開始派入境表。
「咦？點解Welcome to Thailand嘅？乜峇里唔係響印尼嘅咩？」我即刻問男友。他猶豫一下，說：「可能去泰國轉機啩！唔好咁大聲呀！」
「哦！」我答。
「亞柱呀， 我哋填去邊呀？」他扮輕鬆問問坐在另一行的波友。
「布吉嘛。」波友隨即回答。
「呀，係喎！」我們表現得若無其事，但心裏即打了個突。弊！我們的印尼盾……
一落機，我們搶閘出關——大家都需要在當地機場換錢，若我們拿着印尼盾兌換，大家肯定發現我們搞錯地方。蝕了少少匯率不成問題，最緊要是不能給人笑一世。我拿住一疊印尼盾跑去機場最側的銀行交給職員換泰銖，職員望望我又望望印尼盾，再次望望我後問：「你從哪裏來？」
我知道他正猶豫香港人為何以印尼盾換泰幣，我說：「香港，剛去完印尼用剩很多呢。」
「哦！」
網址：www.facebook.com/lamwaimei/