踩入流浮山古蹟潮遊
唔少人話香港係「文化沙漠」，講嘅唔止係讀寫文化，連身處四周都被高樓大廈掩蓋，想搵座具歷史意義嘅建築物，吸收一下靈氣都幾難。其實大家只要往香港嘅西北面走一趟，在屏山至流浮山這段熱門踩單車路線，便會發現唔少歷史建築和園林景致。今次小記同Model一邊慢踩、一邊睇古蹟，做運動之餘仲可認識香港歷史文化，一舉兩得！
事前準備：睇Map預行程
近年興起單車熱潮，唔少人都想四圍踩尋幽探秘，但對於只會假日踩吓大圍、沙田、大埔等單車徑嘅人士，「遠征西北」可能會嚇親大家。其實計劃行程時，建議各位利用手機或電腦上Google Maps，預先了解路線避免行錯路，以及計算所需時間。
Check Point1：屏山文物徑 聚星樓影相熱點
1993年開幕的屏山文物徑，可盡覽坑頭村、坑尾村及上璋圍一帶的古建築，據講新界鄧氏家族早於12世紀已定居於此。由文物徑開端踩起，會見到由舊屏山警署改建而成的屏山鄧族文物館、約於1767年落成的洪聖宮、超過700年歷史的鄧氏宗祠，以及有逾600年歷史的聚星樓。當中以聚星樓最多人駐足，皆因原本作擋北煞、鎮水災等風水用途的三層建築，以青磚打造砌成六角形設計，不少車友都會喺度影相留念。
Check Point2：龍園 坐享小橋流水
好多人都唔知道「龍園」喺邊，原來它位處被高樓包圍嘅天水圍住宅區。於2008年建成的「龍園」，設計上富有濃厚的中國古典味，內裏劃分為多個區域，並以遊廊貫穿庭園。除了備有疊石、園林造景外，亦有曲橋、拱橋營造小橋流水效果。最特別係有兩個鯉魚塘，讓人感受到猶如置身中國古代庭園。小記到訪當日發現遊人不多，作為踩單車的中途休息站最好不過。
Check Point3：流浮山 賞沙江天后古廟
同唔少新市鎮一樣，天水圍大部分地區均備有單車徑，但其實一河之隔便可到達以海鮮聞名的流浮山。只要沿天水圍外環單車徑踩，到流浮山消防局方向的天影路單車徑一段，便可接入對岸深灣路，在分岔口轉左再踩約10分鐘便到達流浮山迴旋處的「歡迎光臨」牌坊，大可在此飽嘗海鮮。之後再踩約10分鐘便可到達沙江天后古廟，據駐廟人員趙小姐表示：「根據廟內大鐘的刻字，古廟建於康熙年間，估計有超過300年歷史。」古廟環境幽靜，保留着舊式建築的橫樑和石柱，廟外一片空地，還可遠眺深圳灣公路大橋，屬龍友的影日落勝地！
單車達人小貼士
雲鵬單車有限公司阿暉表示：「好多單車友會由天水圍踩入流浮山，而路線有好幾條選擇，當中並不建議由天華路經流浮山路進入，因為路窄兼多車！反而由天恆邨對出天橋，經天影路入深灣路就安全得多，細車都能輕鬆應付。要留意，深灣路分岔路轉左就入流浮山，轉右可以去尖鼻咀，千祈唔好轉錯！」
進階選擇：天水圍生態遊
由天水圍單車徑踩入流浮山，再沿深灣路到尖鼻咀觀鳥軒睇雀，又或者到有機農場摘士多啤梨。最後由元朗工業邨出市區，途中可看見魚塘及農地。
入門推介：將軍澳環區遊
很多人都唔知道將軍澳區以單車徑貫穿，而最新一段是從寶盈花園後的海濱長廊踩至日出康城，沿路有海風吹送，兼享雙線大直路，相當易踩。
路程簡介
先由朗屏輕鐵站出發，沿屏廈路進入屏山文物徑；又或者在天水圍西鐵站出發，以聚星樓作起點再入文物徑。之後沿外環單車徑經天葵路到達龍園，再折返並由對岸天影路進入深灣路直踩至流浮山，車程大約4小時。如需要借單車的話，可於朗屏西鐵站旁的單車店，或者天水圍天慈邨的單車店租車，朝十晚十費用大約$40。