新年前後，勁Games都出得七七八八，唯獨2月頭隻《Dead Space 3》值得一玩再玩。前作兩位主角Issac同John終於唔使屈喺太空艙入面打外星喪屍，可到冰凍星球Tau Volantis展開激戰，驚慄感冇少到之餘，仲可以自己砌埋槍，Co-op模式時又加入有趣點子，農曆新年假期煲得過！
《Dead Space》系列最為人熟悉的賣點，其一係外太空打喪屍，其二係無重狀態下飛嚟飛去，第三就係拎住把Plasma Cutter周圍鎅！由於前兩集只可以喺密封太空艙內行動，變化有限，所以新作講兩位主角同其他隊員衝出太空船，向冰凍星球Tau Volantis進發。星球上嘅環境都幾極端，好在遊戲改良自家開發嘅Visceral Engine圖像引擎，令光影效果比之前進步。
另一好玩嘅地方係主角今集能發揮所長，Issac係一位熱衷玩槍嘅工程師，所以今集新增Weapon Bench畀佢砌槍，最基本可以組裝一支輕身嘅單手武器，又或者一支重型嘅雙手武器，仲可以靠現成零件改裝，為Plasma Cutter提升火力，甚至同Flamethrower等結合使用，開發商話生產出嚟嘅武器款式係無限添！遊戲亦預先整咗啲藍本畀玩家跟住砌，新手改槍都唔使怕！
《Dead Space 3》首度對應Co-op合作模式，玩家可隨時加入或者退出，玩嘅時候更加靈活。不過為咗吸引玩家進入合作模式，開發小組諗到條好橋，就係勞動另一主角John。例如John喺雙人模式某些場景入面，會見到同伴見唔到嘅物件；而且有時John會突然撞邪思緒混亂，呢個時候操控Issac嘅玩家就要去保護佢，合作時更講默契。另外，新作可對應Xbox 360 Kinect聲控操作，可以「出口術」補給彈藥同更換武器，不過暫時未知港版遊戲有冇呢項功能。
類 型：第三身射擊
開 發：Visceral Games
平 台：Xbox 360、PS3、PC
推出日期：2月5日
售 價：$449（Xbox 360、PS3）、$389（PC）
查詢電話：3166 6001
撰文：布偉倫