旅人時光：地震避難的錯誤例子
還在日本唸書的時候，經常通頂睇電視。話說某晚睇到深宵4時多，突如其來的特別新聞報告亮於螢幕之中，起初沒留意說的是甚麼，只聽到好像剛有5級地震發生！主播還呼籲各人最好執定重要物品預防餘震時需要避難。
雖然不覺震過，但正攤在床上的我當聽到5級來臨，便即刻彈起執好行裝準備走人 ── 先在櫃底找出個大背囊，將最重要物品統統塞入。只因當時自覺危急又緊張，所以全不知自己放了些甚麼進去，只知全都是我的重要物品。然後，再致電好友道：「電視話有大地震，叫預備走人，快啲起身執嘢啦！」
「依家幾點？」朋友矇矇矓矓問。
「4點幾。」我答。
「算啦，瞓啦！」她答了我便收線。
「激死我！不理我就算！好心無好報的！」我心想。然後，自己乖乖坐在床前繼續睇住新聞報道等避難。大概等了15分鐘，我愈睇愈摸不着頭腦。點解這些地方名字我不懂的呢？咦？個地圖都……喺邊呢？
哎吔，好像是大阪那邊的，我聽錯了新聞報道？原來，是關西的某個縣！
發覺自己搞錯了後，無癮地Unload已塞入袋中的「走難物品」──結果當中竟然是數本3R相簿、數本4R相簿、大疊相底和寶麗萊照片，可是銀包、護照、水、糧食等緊急自救物卻忘記得一乾二淨！如果真的地震要走難，我定會是最狼狽的一個。
網址：www.facebook.com/lamwaimei/