上星期日，友人在灣仔伊館有活動，邀請我上台講30分鐘棟篤笑，據說當晚有觀眾3千人。本文先介紹其中幾個笑話，因為是笑話，所以用廣東話撰寫：
一、主題：「唔使錢嘅嘢，係咁o架啦！」
「社會瀰漫住一股投訴文化，好似年幾前有份免費報紙，畀人投訴佢刊登猥瑣散文，字眼粗俗。我心諗：唔使錢嘅嘢，係咁o架啦！中大嘅迎新營每年都收到好多投訴，批評學生叫喊嘅字眼淫褻、粗鄙。我心諗：冇人叫你山長水遠走入嚟睇o架噃，唔使錢嘅嘢，係咁o架啦！講番呢個騷吖，你哋唔好有咁大期望呀，因為唔使錢嘅嘢，係咁o架啦！」
二、主題：「繞樑得嗰三日」
「我咁嘅年紀，你話我有冇畀人投訴過吖？一世人流流長，總會遇到幾次畀人插得好甘嘅投訴。前排，我畀高登仔插，最唔開心係插得嗰三日！前日睇到，尋日話畀老婆知，今日老婆就話冇喇，落咗畫喇！三日就落畫，真係繞樑三日，呢個原來係個貶義詞，全句係：繞樑得嗰三日。」
三、主題：「露點守恒定律」
「大學生上8點半堂唔要點字，講成上8半堂，因為喺中大人人搭校巴都好趕，為咗趕得上，要將嗰『點』剔除，慳番啲時間。但係我哋又好環保，嗰點正好插入豪宅『帝峰•皇殿』嘅中間。結果，點數冇多冇少，呢個叫『露點守恒定律』，同物理學嘅『動量守恒定律』（Conservation of Momentum）齊名。」
四、主題：「Laughing Point」
「『露點守恒定律』顯示語言科學嘅一面，所以我哋以後唔講佢好容易笑，而係佢笑點低。於是，笑點同沸點一樣，都係用高低表示，例如：The boiling point of water is high while the laughing point of 90後 is very low. 」
（本欄逢周五、六、日見報）
網址：www.facebook.com/benjaminauyeung