Wii U無雙秘技卡決戰

今時今日「無雙」仲有冇吸引力?除了一班死忠Fans外,遊戲大廠Tecmo Koei喺每集「無雙」遊戲都會加入新點子吸引玩家,Wii U平台的《無雙Orochi 2 Hyper》就係一個好例子,雖然用上之前《無雙Orochi 2》作藍本,但加入新角色和招式之餘,仲追加結合卡片遊戲玩法的「決鬥模式」(Duel Mode),可以用秘技卡KO對手,對Wii U玩家嚟講勁有吸引力!

GamePad畫面啱雙打

既然移植到Wii U平台上,到底點樣發揮新機體優勢呢?答案在6.2吋GamePad畫面。玩家於單打時可用來睇地圖和資料之餘,更可篤畫面揀道具同武器;而在雙打時,則可用埋GamePad顯示其中一個玩家畫面,唔使再喺電視上下分割畫面玩,睇得更舒服。始終「無雙」係喪劈式動作遊戲,比較難用到Wii U捽芒、陀螺儀感應方向玩法,幸好其畫質表現和流暢度都不下於之前PS3同Xbox 360嘅「原版」。

追加「紅葉」及「神農」

「原版」《無雙Orochi 2》玩時空錯亂,即係無論《真‧三國無雙》角色、《戰國無雙》角色、其他系列遊戲甚至原創角色都共冶一爐。出得新一集,《無雙Orochi 2 Hyper》自然會加入新角色吸引玩家,而且遊戲內容天馬行空,加上角色限制亦冇咁大,唔使連二打六都要被迫上場。新作追加兩個角色,其一係《Ninja Gaiden》女角「紅葉」,可以用天龍薙刀同神樂弓兩款武器。至於另一新角係同伏羲和女媧齊名的「神農」,以赭鞭做武器,一出招便會飛起晒啲樹葉,夾夾埋埋登場角色超過130個,認真誇張!

善用秘技逆轉形勢

遊戲系列的玩法向來以Tag Mode進行,可揀定3名武將組隊,隨時切換。不過話晒係新遊戲,今集加入咗「決鬥模式」,除了可明刀明槍互劈外,仲融入卡片式玩法。戰鬥時可發動紅、綠、藍、黃4種唔同屬性卡片,分別代表攻擊、輔助、妨礙及特殊能力。卡片左上方數字,為發動該能力的戰鬥點數(BP),而玩家的BP會隨時間和打倒敵人而增加。至於點樣分配及使用唔同屬性卡片,就好視乎玩家自己嘅風格。

DETAILS

類  型:動作

開  發:Omega Force

平  台:Wii U

售  價:約$600

查詢電話:2359 7998

撰文:布偉倫