黃秋生 戲人戲語
出其不意，是黃秋生的拿手好戲。
拍戲三百多部，演活了變態佬、黑社會、警司、神父……兩奪影帝，他卻自嘲拍爛片太多，才練出一身好戲。以為下一站是荷里活……他又來一招反高潮，重踏台板，跟梁祖堯合演對手戲《極地情聖》，下月開Show，大講愛情人生哲理。
由光影跳到台板，為甚麼？「舞台可以令我諗嘢，電影唔得……膚淺囉，一個細路仔池，一個大人池，係咁簡單。」一貫語出驚人，虛實難分。你以為他已厭惡拍戲、憎拍爛片，最恨《八仙飯店之人肉叉燒包》？得到的回應，卻是一個演員最真誠最沉重的告白：「演戲，源於不安、憤怒、瘋狂與自我放逐……」
初踏台板 震撼到嘔
秋生常說，電影與舞台之間，較喜歡後者。為甚麼？那要由他讀演藝時，演出法國名著《大鼻子情聖》（Cyrano De Bergerac）（當時譯作《風流劍客》）說起。
「我好愛那角色——男主角西哈諾牙擦擦，恃才傲物，根本係我嘅寫照。劇本對我衝擊好大，記得第一次讀完，喊到收唔到聲︰嘩……呼……好似嘔吐咁，一世人無十次……」看他說得眉飛色舞，繪形繪聲，可以想像那個廿歲出頭的青澀少年，對初踏台板的狂熱。
演藝畢業後，為了搵食，秋生密密接戲，舞台演出貴精不貴多。2000年，在《螳螂捕蟬》演「爛撻撻」的北越殺手，入型入格；2004年，在黑色喜劇《家庭作孽》做一個好好先生，演得荒誕弔詭。在下月公演的《極地情聖》中，他將飾演白克先生，一名諾貝爾文學獎得主，高傲而遠離人群。對這角色有何想法？「我同劇中角色一樣咁乞人憎，簡直係一種契合，先理解到劇本想表達嘅主題。」
虛幻不安 演員所需
訪談間，秋生不時被角色「上身」，語氣、聲線、做手、表情可瞬間大變。「白先生不停咁纏繞住我靈魂，霸佔我肉體……」他帶着微醺沙啞的聲線，打趣說出演員投入角色的虛幻不安。「開始排戲嗰陣，我有一絲恐懼，點解套劇咁虛、咁軟、咁難以觸摸？係一種『宿醉』嘅感覺，亦係對演戲嘅不安感——做演員絕對需要！包括舞台上嘅不安，你行差踏錯，無人幫到你；亦包括自己面對舞台所產生嘅虛幻感，好似對住成個宇宙，問我係邊個？其實咁樣先『正』，有咩人可以時時刻刻感受生命嘅不安？」
當然，不安，也來自對手與觀眾。「舞台係一場困獸鬥，兩個人，要有即時交流同回應；如果功夫未到家，你死，我又死，套劇就完蛋。此外，演出完畢，收工，我會想起導演活地阿倫（Woody Allen）嘅名言：當你獲得觀眾嘅掌聲，你就要停低，諗吓自己做錯咩……其實我好耐之前已經咁諗︰百分之七十嘅人都係平庸，你能夠令台下掌聲如雷，一定係傻仔……但偶爾傻吓，又何需太介意？」
狂拍爛片 怒火煉戲
說到演技，他常自嘲是爛片拍得多，從中修練出來的。「拍戲超過300部，大多數係爛片。但唔怕爛戲，會有好戲嗎？」這讓人想到觀眾最熟悉的好戲《八仙飯店之人肉叉燒包》，秋生演一個兇殘成性、手起刀落的殺人狂，多年來他都直指自己最憎此角色，諷刺的是，其首個金像獎影帝榮銜就是憑此片奪得。
來到今天，他的想法有了一點改變。「一直好憎呢部戲，去到片場，好似玩老鼠一樣，逼女主角埋牆，狂摳狂摑吐口水，又用水燙又扯頭髮又爆粗又強姦，滿地都係臭豬腸加墨汁溝出嚟嘅假血，好臭，然後導演仲提議我用筷子插女角，話同老婆食飯時諗到，應該好痛……你話，幾痛苦，但睇番又好神奇，演技確實有跳躍，係源於憤怒。我好嬲，唔係針對角色，而係點解我讀演藝三年，準備咗咁多，竟然要去演一個咁嘅角色—揸波，我16歲已經識，仲要去學咩？我真係好嬲，嗰陣試過匿喺間房，殺人狂一樣望實個鐘，心諗︰『死啦，好憎，點做落去？』不停想，好難過，但喊唔出。後來我諗，就當係趁Halloween，送香港人一部驚嚇電影，咁樣一演就好澎湃。」
回歸舞台 重新思考
秋生坦言，接二連三拍爛片，心裏積累的憤怒，可纏繞一個人很久，有人甚至需要看心理醫生，他則選擇跟人「開戰」。至了近年，他又發展出一種自我放逐的心態。「做《野獸刑警》病到黐線，食藥食到懵，導演話點就點；去到《無間道》，嗰陣好窮，冇嘢撈，已經唔再抗爭，接近放棄。當然，我已有角色嘅原型——由細到大，身邊嘅細叔伯都係差佬，一做好快上手。」
放逐，不等於放棄當一個演員。回歸舞台，也許是實踐演技的另一種方式。「電影無法令我思考，但舞台唔同，演出之餘，亦有諗嘢空間。演《極地情聖》要用哲學講愛、性、精神同肉體，像劇中有幾句：『愛情，係一種扭曲嘅性慾，一種偏離，一種錯誤。』、『你以為愛撫令我哋更加接近，其實係令我哋更加分開。』聽來好像靈魂出竅，一時係人一時係鬼，其實說的是性和愛是割裂，不可以放在一起。劇中又講到︰當你愛一個人，你知道自己在愛哪一位嗎？其實就係大家應該去想嘅問題——我哋日日講愛，但我哋有思考過嗎？演出過後，我同觀眾都可以回家想想，總有得着。」
《極地情聖》
故事簡介：諾貝爾文學獎得主白克先生（黃秋生飾演），剛發表了人生代表作《隱藏的愛情》，並接受《諾報》記者──黎斯（梁祖堯）的訪問，結果演變成一場迂迴曲折的殘酷遊戲……
演出日期：12月5~9、11~16、18~23日
演出地點：香港演藝學院歌劇院
查詢網址：www.bigstage.hk
黃秋生
中英混血兒，演藝學院畢業，主演電影近300部，角色亦正亦邪，先後憑《八仙飯店之人肉叉燒包》（1994）及《野獸刑警》（1999）兩奪香港電影金像獎「最佳男主角」，後來再憑《無間道》及《頭文字D》贏得金像獎及金馬獎「最佳男配角」。
撰文：戴寶瑩
部分攝影：胡振文