22吋薄芒玩Android 雙重觸目

Smartphone、Smart TV大家就聽得多，估唔到依家連顯示屏都玩Smart，說的是ViewSonic新作VSD220 Smart Display。今次廠方突破常規，喺22吋LED顯示屏內植入雙核心處理器及Android 4.0系統，仲要支援篤芒功能，當佢係桌上型平板都得；唔鍾意嘅話，撳個掣又可轉番顯示屏模式，接駁Win 8電腦玩篤芒操控又得，經HDMI連接PS3打機亦得，一物多用佢至叻！

售價：$3,990

21.9mm超薄機身

叫得Smart Display，當然有個智能平台畀用家玩啦！VSD220預載Android 4.0系統，更加將1GHz雙核心處理器、1GB RAM、Wi-Fi模組、120萬像素鏡頭等硬件，一併放入22吋篤芒機身內，規格拍得住市面上嘅平板電腦。難得係新機整合咗咁多功能，機身仍只得21.9mm咁薄，同傳統電腦薄芒差唔多，擺係客廳上網或廚房睇食譜都絕對唔阻地方，比All-in-One電腦更加方便。

玩Apps睇片流暢

新機用得Android系統，自然可玩到Gmail、Google Maps等一眾自家服務，配合公版介面設計，玩開Android手機或平板嘅用家都好易上手。小記即場用來玩遊戲Apps、睇YouTube短片、上網打字等操作，發覺流暢度幾高，喺22吋大芒上面玩勁爽。唯一要留意是屏幕Size咁大，如果玩普通手機Apps時，會因解像度不足而令畫面有少少矇。建議大家下載平板專用嘅HD版，畫面效果靚得多。此外，廠商表示遲啲會推出自家Store《ViewSonic Appzone》，提供更多Apps供下載，咁就唔愁冇嘢玩啦！

將電腦視訊輸出至Smart Display後，再接駁USB便可篤芒玩Win 8。

將電腦視訊輸出至Smart Display後，再接駁USB便可篤芒玩Win 8。

機側備有USB插口，外接鍵盤和滑鼠操控都得。

擴充介面充足

講番屏幕部分，新機啟動時預設會進入Android系統，用家只要按畫面左下方的OSD Menu作設定，便可將畫面轉為HDMI輸入，接駁電腦或遊戲機等都冇問題。而1,080p解像度、1,000:1對比度及250cd/m2亮度這些規格，以22吋顯示屏來說算是不俗；配合SRS 3D音效技術，睇片、打機聲效都唔錯。值得一提，新機除了micro HDMI外，亦有microSD卡槽及3組USB插口，後者可外接鍵盤、滑鼠等配件之餘，更支援OTG功能，擴充力強。

另一邊備有micro USB及Audio插口，擴充力強。

microSD卡及LAN插口設於機背，唔用Wi-Fi的話亦可透過LAN上網。

機座支撐架備有彈簧調校角度，平放或直立篤芒都冇問題。

同場加映：雙光源投影機Pro9000

發布會還推出全球首部1,080p Laser Hybrid LED投影機Pro9000，採用LED及雷射雙光源引擎技術，比傳統燈泡光源的盡質更豐富和銳利，對比度高達100,000:1，耗電量亦較低。另一優點是投影時毋須等待燈泡預熱，即開即用；加上使用壽命高達20,000小時，是傳統投影機燈泡壽命的5倍，適合長時間使用。