無骨八爪魚 6米箏巴閉
「好大隻八爪魚呀！」呢句係拍攝當日，於大美督最常聽到途人講嘅真實對白。嗰日小記同模特兒並唔係潛入水底捉八爪魚，而係由風箏達人Haiven教路，放起6米長嘅巨型八爪魚軟體風箏，比起大家兒時玩嘅小型風箏，今次確實玩得幾囂，之後仲放埋巨型哈哈笑風箏同心心風箏Show Off添！近期普遍吹起3至4級風，係放飛嘅好季節，行山之餘玩風箏確實一樂也。
新興「無骨」軟體風箏
這隻6米長的八爪魚軟體風箏，受風面有1.5×1.5米，差唔多成個人咁高，計埋8隻爪隨風飄揚，放到高空一樣咁搶眼。但風箏達人Haiven話佢其實唔算大，他一年前喺昂坪便集幾人之力，放過隻10米長，受風面有3×3米嘅八爪魚風箏，果真一箏還有一箏大。
平時大家玩開由竹枝或玻璃纖維支架製作嘅風箏，軟體風箏又有何不同？開設網上風箏店的Haiven表示：「軟體風箏係『無骨』，即當中冇任何支架，靠頂部的風袋充氣形成受風面，再利用風箏上多條支撐線穩定風箏。好處係收藏同組裝容易。但由於『無骨』，一人放飛時便需要搵硬物如背囊托住風箏，有多一個朋友幫手托起會易放啲。」
多種款式配手握輪
放風箏當日，見Haiven拎住一個Size不大的風箏袋，以為只帶了兩三隻風箏來放，殊不知它猶如八寶袋一樣，由八爪魚、哈哈笑到心形軟體風箏，到不同顏色的吸血蝙蝠、小火龍等中小型風箏，拎極都仲有，不少更是香港獨有款式。問起價錢，他說：「普遍風箏都係幾十元至百多元一隻，就算我間網上風箏店有租風箏服務，但絕大部分客人都係買風箏，經郵遞方式送貨。」
小記自問Old School，還以為放風箏一定要用線轆，Haiven卻帶來了一個大過手掌嘅手握輪，藉此操控輪胎線。他補充，手握輪的優點是收線速度快，收線時亦唔需要自己退後，一般25cm直徑Size已能做到80磅拉力，大部分風箏都夠玩。如果是小朋友則可揀20cm直徑手握輪，放中小型風箏絕冇難度。
注意風速及風向
風箏、器材齊備，但放飛之前必須注意風速和風向。放風箏當日天文台網頁顯示有4級風力，已夠玩中型風箏及軟體風箏，但現場風勢時有時冇，試過飛飛吓唔夠風跌番落地。Haiven話好多時要靠經驗才知道現場夠唔夠風玩，最緊要係感覺到持續穩定嘅風；而且放飛時要識得調整航道，尤其是在靠山地區，或者多隻風箏同時飛行時，就好易「Kick線」，有唔少風箏迷喜歡這樣「鎅鳶」，但Haiven就話不太鍾意，傾向追求大型風箏飛上高空時的成功感同自由感。呢點小記好認同，無謂搞到通山樹頂都係被遺棄的風箏啦！
Falcon Art網上風箏店
查詢電話：6113 2567
網址：www.kitehk.com
撰文：布偉倫
攝影：郭凱敏
模特兒：In Lee