相信好多Game迷都等緊明天賣街嘅《Call of Duty: Black Ops II》，一來系出名門有信心保證，二來睇之前嘅洛杉磯大戰短片，已經型到冇朋友！唔止戰爭場面做到勁有氣勢，新作更加入好多新元素，如將遊戲背景設定喺2025年時空，好多未來科幻武器大派用場；另亦加入Strike Force Missions支線故事，稱得上係一套滿分之作。
《Call of Duty: Black Ops II》背景橫跨上世紀80年代冷戰時期到2025年嘅未來，亦係遊戲系列首次將戰場搬到未來，好似軍用機械人、無人駕駛載具，甚至電子戰爭武器都會於遊戲出現，佢哋不僅是玩家在戰場上的對手，仲可以收歸旗下對付敵人。故事講2025年中國因為股市遭到黑客入侵而停止稀土出口，形成中美冷戰；喺故事模式入面，玩家最初係控制上集主角Alex Mason，之後就操控佢個仔David Mason迎戰未來！
在描繪未來戰場方面，今集每個場合都做得好刺激，令大家一拎住手掣，腎上腺素就不斷飆升。2025年戰場包括洛杉磯、新加坡同也門，新加坡場景主要喺貨櫃碼頭上開戰，最後仲激到引爆導彈。講到最震撼莫過於洛杉磯大戰，護送人質時被炮火襲擊炸到飛起，跟住要喺一片頹垣敗瓦由公路打到入商場，仲要控制戰機在城市內低飛，認真刺激。新作加入多個支線故事Strike Force Missions，入面可以控制機械人、噴射機同無人駕駛飛行器等，但要留意支線故事係會影響主線故事，一旦失手死亡即刻Game Over。驚自己頂唔順嘅話，可以用新增嘅CODcast模式，以不同角度實時睇晒成個戰場嘅隊友激戰，但只支援Local Play之上。
另一重頭戲喪屍模式，就冇分現代或未來。以前打喪屍只能在一幅細地圖入面怒射，再靠賺錢過版買裝備，而新增的Tranzit玩法就唔同啦，版圖由幾幅細地圖組合而成，去唔同區域只需搭巴士過去，亦唔使再咁賺錢升級裝備，可靠隨地執到嘅物件組合成新武器打喪屍，玩法有幾分似《Dead Rising》。至於另外兩個喪屍模式Survival同Grief就同之前分別不大，都係喺一幅地圖入面狂射打極都打唔完嘅喪屍。Survival支援單人或4人合作；而Grief就係8人分兩隊對戰，睇吓邊隊捱得耐！
類型：射擊
開發：Treyarch、Activision
平台：Xbox 360、PS3
推出日期：11月13日
售價：$399
查詢電話：2418 8896
撰文：布偉倫