Nissan SUNNY Green Luxury 細偈好駛

家庭房車最緊要經濟實用，尤其對養車預算不多的用家，除咗車價要平外，燃油開支當然愈低愈好，搭配細容積慳油引擎的車款無疑是首選，正如全新抵港新一代日產（Nissan）SUNNY Green，便改配了更經濟的三汽缸引擎和高波牙比無段變速自動波箱，能做出22.6km/L的超低油耗。同時，SUNNY Green已獲政府認可為環保汽油私家車，即使是設備齊全的Luxury版，扣除稅務寬減後的車價都唔過$17萬，供車同養車都相當Easy，荷包自然更見使！

售價：$169,800

無匙系統啟動方便

全新SUNNY Green Luxury的車身尺碼比不少同級對手都來得大，長、闊、高分別達到4,425×1,695×1,495mm，這不僅有利於建構寬敞車廂，整部車看來亦更有體面。為提高使用方便度，原廠加入了Keyless Go無匙系統及按鈕式引擎起動系統，只要輕按一下門邊手柄按鍵便可開啟門鎖，再按下軚環旁的「START STOP ENGINE」鍵便可啟動引擎，由取車到開車都毋須取出車匙。另一方面，行李箱設計寬敞方正，容積達到490L，比Tiida的467L更加見使，放置大型行李有很大便利性。

三汽缸引擎慳油力足

今代SUNNY Green的引擎由以往的四汽缸改為三汽缸，容積亦下調至1.2L，體積更細小，而且輕巧，配合高波牙比的新一代Advanced XTRONIC CVT波箱及智能停車熄匙系統（ISS），一方面具備超低油耗水平，起步反應亦相當敏捷。舊時的三汽缸引擎，一直都有噪音大、震盪大的弊病，但新SUNNY Green並沒有這個問題，無論是引擎怠速或高負載時，乘坐感與以往的四汽缸SUNNY分別不大，震盪非常輕微。新車的峰值扭力有10.8kgm，數值雖不算大，但揸起嚟又唔會話好冇力，大概四分三油門便可輕鬆上大帽山，即使全車坐滿人都可應付自如。

引擎改配三汽缸，容積小巧夠力。

後座非常闊落，腿部空間充足，不會頂腳。

穩定控制系統防打滑

車廂空間是新SUNNY Green的一大賣點，後座腿部空間達到636mm，闊度可媲美高級行政座駕，就算乘客身高6呎，都一樣坐得舒適自在，車廂空間在同級中有一定優勢。為提升安全性，原廠已為新SUNNY Green加入車輛穩定控制（VDC）系統，當系統偵測到輪胎出現打滑，便會透過減低引擎輸出、拖波或對個別車輪作出制動，主動作出修正，確保在濕滑路面行車都有上佳穩定性，配合前座雙安全氣袋及堅固的車架，為乘客帶來充分保障。代理指，SUNNY Green Luxury的標準配備還包括自動恒溫冷氣及後座手枕連杯座，車價僅為$169,800，加上油耗低，一般打工仔都「供養」得起。