知識•知惜　龍尾生態探秘

近日大埔龍尾灘成為城中熱話，不少人聞風而至，令以往人迹罕至的石灘變得人頭湧湧。不過，很多人都唔識正確保育觀念，隨手拾起海星蟹仔、觸碰海馬魚群，甚至亂翻石頭戲水，無形中破壞了生態環境，反而加重了龍尾灘負擔。如果想近距離觀察海洋生物，又唔想做破壞生態的「兇手」，咁就要聽吓生態協會導師蘇樂軒（Ray）的指導。

潮退易搵海中寶

去得龍尾灘當然希望睇到海洋生物，例如巴布亞硝水母、長棘海膽等，好運的話更可見到管海馬、海龍等。唔講唔知，原來潮汐漲退，同搵唔搵到海洋生物有直接關係。Ray指出：「潮退時不但水質較為清澈，原本淺水的位置更會變成淺灘，遊人可以行得更出，相對容易睇到深水生物；而秋冬季節的退潮時間多數在深夜時分，如果有心探索便建議夜間出發，並於出發前留意天文台的潮汐漲退時間。」

記得要「有手尾」

好多人去到龍尾灘，都會翻開石頭和挖洞搜尋生物，咁樣不但令該處滿目瘡痍，更會破壞生物棲息環境。Ray再三強調：「千祈唔好帶走該處的生物，即使用作觀察，亦唔應該暴露喺水面及活捉時間太長，觀察完畢後記得將牠們放回原處。同樣地，就算翻起石頭觀察岸上生物，都要『有手尾』將石頭擺回原來地方。最重要是不要胡亂觸碰牠們，因為部分生物如水母、魔鬼魚等有一定危險性。」如果人人都守規矩去觀察，已經對生態環境作出很大貢獻。

踩單車<BR>大美督附近有不少租單車店舖，有兩個轆的單車或四個轆的家庭車選擇。租車費用約$50/全日（單車）、約$80/全日（家庭車）。

踩單車
大美督附近有不少租單車店舖，有兩個轆的單車或四個轆的家庭車選擇。租車費用約$50/全日（單車）、約$80/全日（家庭車）。

BBQ
雖然大美督範圍內有唔少燒烤場，但假日經常爆滿，記得提早霸位。

個人安全最重要

想有更多發現，很多時需要走到較深水位置，但龍尾灘滿布石塊，加上石蠔、藤壺依附於石塊上，其實暗藏危機。唔想被蠔殼刮到雙腳傷痕纍纍，就要做足保護措施。Ray建議：「有意落灘濕水的話，可穿着水上活動專用鞋，不過呢類鞋並不便宜，想經濟一點可穿俗稱『白飯魚』的白布鞋；另外再穿着跣水的長褲保護雙腳。如果翻開石頭時唔想被蠔殼刮損手，亦可準備一對勞工手套作保護，去遊玩最緊要玩得安全。」