上次到銅鑼灣怡東酒店地庫雙城吧（Dickens Bar）進餐，應該是1996年的事。時光一晃16年，我已變成中坑，雙城吧亦已「整容」，換上全新裝修，不過英倫氣氛依舊，咖喱自助餐繼續200蚊有找。
對我來說，怡東酒店是一個奇異地方，貴為銅鑼灣最具資歷、最有地位兼最強吸金力的酒店之一，水準卻不是太穩定，怡東軒算是得！ToTT's都幾唔得！Cammino冇話得唔得！Cafe on the 1st單點菜式好得但自助餐好唔得！前來酒店用膳，究竟開大或開細，像到黃大仙求籤，大概要憑當日運氣。相比之下，雙城吧較為可靠，咖喱羊肉不會太差，英國金巴倫香腸難以出錯，來自世界各地的80多款啤酒亦相當討好。不過，作為一間Sports Bar，生意起落未必與食品水準有太大關係，正如公關小姐說：「如果曼聯輸了波被踢出局，生意便會差一截。」
男生前往雙城吧， 固然要上廁所，也最好上廁所時瞄瞄，尿兜上方貼有即日報章體育版，天花板角落亦設有電視機，讓各位一邊面壁「開水喉」一邊追閱體育消息或追看比賽情況，真是體貼無比，連太太和女友也未能如此「急男人所急」。
有些男人很愛Multi-tasking，運勁拉浮金時仍不忘一刻值千金，讀書、看報紙、刨馬經、睇八卦雜誌、打PSP遊戲、用iPad上網……他們的個人物品，均有可能與男人赴湯蹈屎、如廁隨形，觸碰前最好消毒，觸碰後請記得洗手。
網址：www.chan-wai.com