Forza Horizon科羅拉多州自由飆
《Forza Motorsport》系列以真實度高見稱，去年第4集嘅市場反應不俗，開發商自然不甘於只出一條產品線，遂於今年開創以高自由度作賣點的副線《Forza Horizon》。簡單來說即係以《Forza Motorsport 4》嘅遊戲引擎和視覺畫面，配合喺沙塵滾滾嘅科羅拉多州24小時任揸，可以周圍參加比賽或向其他車手「挑機」，應可吸引到一眾追求飆車樂趣嘅玩家！
集各家之大成
一玩《Forza Horizon》，很容易便會發現其他賽車遊戲的影子，好似以沙地為主嘅科羅拉多州背景就勁有《DiRT》感覺，靠賽車特技取分的玩法又似《Project Gotham Racing》，向其他車手「挑機」又似《Need for Speed》。據講開發商設計遊戲時挖咗唔少其他賽車遊戲嘅開發人員幫手，某程度係集大成之作。比起原作追求真實感，《Forza Horizon》好有嘉年華Feel，可駛到賽事報名處參加比賽，亦可漫無目的任意兜風，揸車途中遇到其他玩家架車更可「挑機」。
白天鬥到夜晚
比起好多賽車遊戲只追求速度感，往往忽略咗背景畫質，新作明顯有所改善，沙塵滾滾嘅感覺出晒嚟之外，連失控剷入田野或者草叢時，背景同車輛嘅物理反應都相當逼真。今集亦追加動態時間轉換系統，可以由白天揸到夜晚，途中仲可欣賞到夕陽同Magic Hour添！遊戲由於得到很多真實車廠支持，所以備有大量靚車和零件升級，車迷更可手動Tune車提升戰鬥力；新手亦可揀自動升級設定，迎合不同需要。
任務種類有趣
遊戲任務種類相當多，例如有正常的鬥快比賽，又有要喺特定地點鬥高時速衝線，甚至有到指定地方影靚車加靚景嘅任務。當中必玩嘅任務，肯定係揸住架車同螺旋槳飛機和直升機鬥快穿越Check Point，賽車遊戲中相當少見。今集電腦AI更加聰明，會自動搵捷徑行走，幾有挑戰性。另外，由於《Forza》系列都好有名氣，今次斟咗唔少真實「贊助商」番嚟搞挑戰賽，只要完成指定特技，便可得到贊助費，例如甩夠25次尾就可達到G-Shock甩尾戰Level 1資格，咁就有幾千蚊獎金買裝備！
DETAILS
類型：賽車
開發：Turn 10 Studios
平台：Xbox 360
售價：$329（標準版）、$459（限定版）
查詢電話：3071 4868
撰文、部分攝影：布偉倫