防水濺997D 煲粥16小時

香港人個個智能手機玩上癮，食飯、搭車頭耷耷、手指指，可惜電池玩半天就乾塘，搞到不少人經常要帶後備電池出街，麻煩到震！Alcatel新機onetouch 997D就有計幫到大家，內置低耗電處理器及1,800mAh電池，可以狂煲16小時電話粥；加埋機身防水濺設計，落雨都可以安心傾偈！

售價︰待定

大電池低耗電

智能手機愈出愈大芒，部部都係食電怪，唔諗計真係好快冇電！997D先從電池着手，將電量加大至1,800mAh，即是跟HTC機王One X相同，在Smartphone中算係數一數二。另一方面，手機採用MT6577雙核心1GHz處理器，雖然效能只屬一般，但具有低耗電這優點，配合智能控電程式，就算無間斷通話都可撐足16小時，認真誇張！最難得嘅係機身僅10.95mm咁薄，重量亦只有143g，拎上手完全唔覺係負擔。

納米塗層機身

Alcatel手機部門由於被TCL通訊收購，故新機在內地又稱為「大鯊魚」，除因為其流線渾圓外形，以及機背仿魚鰓的防跣手壓紋外，最重要係佢由機身到電路板都經過Aridion納米塗層處理，達到防水濺效果。廠方指，這技術具有極佳的防水防油特性，雖然不能讓手機潛落水底，但遇水時會把水珠「咬實」在表面，避免流入內部對零件造成損害，落雨帶出街傾電話自然更加放心。惟留意新機屏幕也用了這技術，可惜塗層雖薄，但依然減低了屏幕通透度，有辣有唔辣！

螢光橙機背分外搶眼，表面更有仿魚鰓壓紋設計。

機身厚度僅10.95mm，以大電池手機來說唔算厚。

3G雙卡雙待

說到系統，新機順應潮流「升呢」至Android 4.0，但用的是公版介面，而且1GHz處理器效能有限，由轉頁到開關Apps，感覺都唔算快。幸好多媒體應用方面交足功課，例如支援SRS環迴立體聲、對應DLNA技術；而800萬像素鏡頭又提供美顏、HDR及16張連拍等拍攝功能，整體比好多國產機有誠意得多。提到國產機，不得不提它支援雙卡雙待功能，最正係可以同時兼容兩組3G網絡，合乎經常中港兩地走的人士需要。