近期射擊大作排住隊登場，但要數最快手莫過於下星期開賣的《Medal of Honor: Warfighter》，搶盡頭啖湯。兩年前破舊立新唔打二戰，改打現代戰爭嘅《Medal of Honor》大獲好評，到新一集再度強化，換上新遊戲引擎打造更像真的戰場，仲可以深入近年有真實軍事任務嘅索馬里，甚至係捉拉登嘅巴基斯坦等，任務途中想抖啖氣都抖唔切！
延續上集嘅現代戰玩法，新作用上好多真實軍事任務改編串連，讓玩家投入戰場氣氛。遊戲於開發時期，更請來真正特戰隊成員一齊編寫故事，就算唔能夠十足十反映到戰場真實情況，至少都有九成以上係真，當然更有說服力。遊戲單人模式以Tier 1 Operator 「Preacher」角度出發，講他長年駐守海外，令婚姻出現危機，又要解決由極度危險爆炸品PETN所帶來的世界危機，真係手背係肉，手心又係肉。今集所能控制的角色由上集4個減為2個，除咗Preacher之外，仲有美國SEAL海豹突擊隊成員Stump。
遊戲戰場是今集最吸引的地方，好似深入菲律賓某個地區，拯救被挾持在國會大樓的人質；又要去到海盜猖獗的索馬里清剿武裝海盜，同埋要去巴基斯坦同武裝分子激戰。至於遊戲會唔會有捉拉登任務？正式故事雖然冇講，但廠方同奧斯卡最佳導演嘉芙蓮碧姬露（Kathryn Bigelow）執導嘅捉拉登電影《Zero Dark Thirty》夾計，推出兩幅電影內的巴基斯坦地圖DLC，下載費用約800 MS Points。就算遊戲內冇拉登現身，但至少能化身成海豹突擊隊成員，執行這場不可能的任務。
遊戲未正式推出，多人模式Beta版已於日前供網上下載，唔少機迷可能已領略到新作好玩之處。今集的任務極之緊湊，剛剛在搶灘任務解決一班敵人之後，又會畀敵方轟炸，在一大片灰塵瓦礫中應付打極都打唔完嘅敵人。仲有一方面要讚，就係遊戲畫質比上集出色，好似開戰時揚起的灰塵、空中飄揚的紙張，甚至被轟炸後樓房的碎片都勁細緻，皆因新作改用《Battlefield 3》出晒名嘅Frostbite 2.0引擎。真實感仲來自戰場的實際體驗，例如用Sniper狙擊槍瞄幾條街遠嘅敵人時，要估計埋拋物線距離，想做到Headshot就要將準星瞄高半個頭位左右，幾考技術！
類型： 射擊
開發： Danger Close
平台： Xbox 360、PS3、PC
推出日期： 10月23日
售價： $449（Xbox 360、PS3）、$389（PC）
查詢電話： 3166 6001
撰文：布偉倫