Xperia Tablet S 瘦身扮遙控

平板電腦出唔停，但部部倒模咁樣，悶到爆！好彩玩慣型格設計嘅Sony不落俗套，新推Xperia Tablet S的外形和功能都有所突破，不但用上「書卷形」設計，流線纖薄好手感；仲符合防濺水規格，配合遙控器巨集功能，以後阿媽喺廚房都可以濕住手遙控廳中電視。

售價︰待定

激薄機身設計

Tablet S早於去年面世，今次以同名推出後繼機款，除了首度收歸手機部門Xperia旗下，還把機身厚度由10.1mm激減至8.8mm，重量亦由598g瘦身至585g，整體更纖薄輕盈。外形則以捲起的書卷作靈感，上肥下瘦符合人體工學，平放時屏幕還微微向前傾，睇得更舒適。若嫌未夠方便，用家還可另購五色保護套及S-master底座等配件，將平板垂直擺放。屏幕方面，大小及解像度分別達9.4吋WXVGA級數，觀感唔錯，而且飽和度高、黑位夠層次，睇片和打機都甚有水準。

操控全屋電器

日系平板電腦愛玩防水設計，呢次Tablet S亦終於對應，機身符合IPX4防水標準，雖不能潛入水中，但能做到防濺水效果，換句話說濕手一樣篤得到，最啱阿媽帶入廚房邊煮餸邊煲劇。擴充方面，HSPA+、藍芽、Wi-Fi無線功能全部有齊，但由於機身不設USB插口，要靠專用接線才能接駁電腦或充電，較為麻煩。值得一提是其IR紅外線技術可配合巨集功能使用，只要跟家中的遙控器進行配對，以後用平板電腦便能控制全屋電器，勁有科幻Feel！

預載Android 4.0系統，但介面由舊版PS式目錄，變回公版設計。

機背內建800萬像素鏡頭，但抽起了LED補光燈。

追加訪客模式

外形、功能大幅升呢，內涵亦不遑多讓，處理器採用四核心Tegra 3，配合Android 4.0系統，轉頁、睇片都極為順暢。介面是較令人失望的地方，廠方將以往客製化介面變回公版，無法幫程式分類。猶幸新增「Small App」及「Guest Mode」兩大功能，前者可在任何時候開啟瀏覽器、計數機、備忘錄等小工具；後者則為每個訪客制訂主頁及可用程式，仲可加入密碼，避免八卦朋友胡亂使用。