朱鼎健 高球狂熱

提起朱鼎健（Ken）這名字，立即聯想起「觀瀾湖」，因Ken正正就是這全球第一大高爾夫球會──觀瀾湖的集團主席兼行政總裁。大家為何會對此集團如此熟悉呢？相信與他們於2010年首次舉辦的「觀瀾湖世界職業明星邀請賽」有着密不可分的關係。一眾荷里活巨星如曉格蘭特（Hugh Grant）、嘉芙蓮仙蒂鍾斯（Catherine Zeta-Jones）等；體壇健將如「飛魚」菲比斯（Michael Phelps）、體操王子李寧、中國籃球名將姚明等，都聚首一堂參與此球賽！

第二屆明星賽

而第二屆賽事將於本月19-21日舉行，今年更會請來荷里活女星伊娃朗歌麗亞（Eva Longoria）、《花邊教主》女星Blake Lively及其新婚丈夫《綠燈俠》男星賴恩雷諾士（Ryan Reynolds）、Minka Kelly等，亞洲區方面亦有甄子丹夫婦、楊紫瓊、陳妍希、楊采妮、Twins等坐鎮，星光熠熠。難掩興奮心情的Ken，嘴角微翹地說：「其實佢哋個個私下都有打高爾夫球嘅習慣，高爾夫球係世界語言。」

朱鼎健（中）邀得曉格蘭特、郭富城為首屆賽事出力。

嘉芙蓮仙蒂鍾斯於去屆賽事中表現出色。

Ken深信借助各路名人紅星的力量，更能令本身對高球沒興趣的市民增加對此運動的關注度，真正做到普及化。他笑言：「菲比斯上年仲試過喺水裏面打高球添！佢話要將佢兩樣最愛結合喎，真係一個好活潑、好生動嘅人。仲有姚明都係，高球係佢近來嘅新喜好。佢改變咗成個NBA、改變咗中國人對籃球嘅睇法。高爾夫球都需要一個中國嘅英雄，雖然依家暫時仲未出現，但係我相信有佢嘅協助，能夠幫助到高球喺中國未來嘅發展。」

觀瀾湖因與慈善機構UNICEF合作，令Ken與其大使張曼玉、楊采妮及楊千嬅等結緣。Ken大讚千嬅既熱心、又善心爆棚。「佢好熱心幫助海口市推廣，又幫嗰度做咗個旅遊特輯！早前仲幫我哋拍咗慈善T恤嘅宣傳相，係佢產後第一次出鏡，真係好有心！」除此之外，Ken對於推廣電影工業不遺餘力，當楊采妮向他提出希望於觀瀾湖取景，拍攝其處女執導電影《聖誕玫瑰》時，他毫不猶豫便答應了，做到雙贏局面。

朱鼎健曾代表香港東亞運動會傳聖火。

熱心公益的朱鼎健（左二）與曾志偉（右二）、霍震霆（中）等攜手舉辦「高球界5.12關愛行動」。

與馮小剛結緣

他因高球而與不同的名人紅星結緣，要數當中的好兄弟，實非內地著名導演馮小剛莫屬，二人因打高球而一見如故，如今已進化成無所不談的知己。「佢拍戲好辛苦，好似拍《溫故一九四二》，因為係悲劇，拍攝氣氛好沉重。所以佢每次拍完戲之後，都要嚟打吓波，放鬆一下！」今年，他們由好知己發展成為合作夥伴，更夥拍華誼兄弟董事長王中軍，三人合力打造「觀瀾湖華誼馮小剛電影公社」。他們計劃興建電影主題公園，並以馮小剛電影裏的場景為建築規劃藍本，誓把經典場面如《非誠勿擾》舒淇及葛優所入住的鳥巢酒店、《天下無賊》的火車等搬到現實世界，滿足一眾電影發燒友的欲望。「其實我哋年中先突然決定走埋一齊。我哋傾開偈，講起呢個構思，而我又有地，覺得可以發展，而且我哋都想將自己嘅喜好發展為另一個事業，目標係打造一個『老少咸宜、四代同堂』嘅旅遊區！」

父親影響深遠

觀瀾湖發展得有聲有色，作為揸弗人的他，謙稱企業的成功絕非一個人的功勞，而是靠整個團隊的努力，他更不忘感激亡父朱樹豪對他的栽培及影響：「我自六歲起就已經決定將來要幫爸爸手做生意。喺我出世嗰年，爸爸成立咗自己公司，佢日日早出晚歸，有陣時星期日佢會帶我返公司，佢做嘢，我坐喺隔籬玩。屋企生活環境不斷改善，仲喺我六歲嗰年第一次買車，知佢為咗頭家好努力！」父親努力的身影，令Ken找到人生目標，並早已為將來鋪路。當他仍是十多歲的小伙子時，每逢暑假，都定必到社會打暑期工，吸取工作經驗。別以為貴為富二代的Ken會得到優待，原來下至剪草、侍應等職位，他都統統經歷過。「爸爸由細就教我『力不到不為財』，每樣嘢都一定要親力親為、努力去做，先至係成功嘅關鍵。」他就是抱着這格言，努力發展事業、宣傳高球，希望於不久的將來在中國發揚光大，成為最炙手可熱的運動。

對家庭重質不重量

Ken不但高球了得，他亦熱衷於各種運動，如跑步、欖球等，更曾為香港東亞運動會傳聖火，認真巴閉！已是兩女之父的Ken，忙得不能常常陪伴她們左右，但他深信家庭時間是「重質不重量」。熱愛打高球的他，當然有把他的技術傳授給女兒，笑言：「佢哋都有打，不過一定要我陪佢哋，當然我都好享受呢啲家庭樂啦！」為了爭取時間陪伴家人，他更花三萬港元，於家中添置一台跑步機。那麼即使是運動的時間，也能抓緊每分每秒，與家人在一起。當被質疑單憑短短的運動時間，是否真的能與女兒保持良好關係？他即流露出勝利者笑容說：「我細女成日都話『Daddy is my boyfriend.』」答案不言而喻。

千人揮桿回饋社會

要數Ken最難忘的工作經歷，他表示必定是於2009年所舉辦的「高球界5.12關愛行動」。當年發生四川大地震，他與一眾圈內好友如曾志偉、任達華、陳百祥等，均希望為內地出一分力，故發起該慈善活動。他們更聚集逾千人同時打高爾夫球，做善事之餘，更打破了世界紀錄，可謂雙重意義。「其實呢個活動喺實行上遇到好多問題，你諗吓成千人一齊揮桿，又要搵地方放佢哋嘅物品，打完之後又要安排佢哋拎番啲嘢，又要安排佢哋食飯、沖涼。咁多人喺同一時間做，實在唔容易。」幸好他們絕不輕言放棄，積極解決問題，而且背後更有專業的團隊支援，故活動都得以圓滿結束，更籌得六百多萬元善款，真正做到回饋社會。

採訪：龔凱欣

攝影：司徒國榮