東京直擊！100台芒亨4 3D獵龍
Game壇年度盛事東京遊戲展（TGS）正舉行得如火如荼，雖然今年首日嘅入場人數唔算多，但一啲大作依然其門如市，玩家排個幾鐘隊一樣心甘命抵。而擂台躉有兩套遊戲，第一當然係N3DS新版《Monster Hunter 4》（簡稱：芒亨４），另一款係玩家等到頸都長嘅《Metal Gear Rising Revengeance》，雙雙呈現「斬擊」美學！
《Monster Hunter 4》試用新武器
《Monster Hunter 4》係全場最多試玩機嘅遊戲，在Capcom攤位入面有成100部N3DS，以4機為一組，供玩家組隊獵龍；而每張試玩枱都有位「芒亨」Game Girl真人教路。雖然現場有咁多部機，但每次試玩都要排隊近1小時，足見人氣爆燈！作為N3DS大作，最緊要當然係3D顯示，小記試玩咗15分鐘，發覺畫質比上代靚好多；並用上新武器「操蟲棍」狩獵，操控有啲似「太刀」橫斬方式，亦可利用武器在原地起跳。另可使出「操蟲」特殊技能，向目標發射及收回獵蟲，效果有啲似前作的「狩獵笛」。值得一提是今集不但可以喺地面劈，仲可睇準時間利用地形跳上魔物身上，於背脊上搏鬥，不過呢個動作唔易成功！
推出日期：2013年春
《Metal Gear Rising Revengeance》校靚角度斬擊
講咗3年，《Metal Gear Rising Revengeance》終於喺今次TGS畀大家試玩，Konami攤位內雖然擺足50部機，但小記都要排個幾鐘先有得玩。試玩之前，幾十人要一齊睇試片，同埋聽靚女指揮官講解任務和特點。由於係Tutorial模式，主要畀大家試吓面對面劈人等操控，所以都唔難應付。最過癮是主角「雷電」會不斷從耳機收到總部嘅任務。於實戰時，當就快斬死敵人便會進入「斬擊模式」，會有一段時間玩慢動作，好讓大家校靚角度斬擊，仲可以乘機伸手入敵人身體，扯出自我修復裝置。雖然冇噴血效果，但都夠刺激。
推出日期：2013年2月21日
PS3新Games速報
《人中之龍5 夢、實踐者》新增熱血動作
《人中之龍》出到第5集，主角加到5個，甚至連少女澤村遙都有獨立故事玩。有趣嘅係每個角色都新增熱血動作，使出時全身着晒火，例如桐生一馬會變得好狂暴、島大河可隨手拎起路牌攻擊。
推出日期：2012年12月
《DmC Devil May Cry》天使惡魔模式
動作同場景設計依舊華麗，主角但丁在空中可使出多段踢腿，亦可浮起身邊的敵人慢慢打。但今集最吸引係可切換天使或者惡魔模式攻擊，要跟住敵人嘅顏色而轉Mode，先能夠打低佢哋。
推出日期：2013年1月15日
《Injustice: Gods Among Us》蝙蝠俠大戰超人
這款是以DC漫畫做骨幹嘅格鬥遊戲，如蝙蝠俠、超人、閃電俠可使出自家絕招對打，未玩先興奮。動作表現細緻，招式更多變化，話晒背後係由開發《Mortal Kombat》嘅團隊操刀，信心十足。
推出日期：2013年4月
《God of War: Ascension》前傳照殺神
戰神三部曲完結後，《God of War: Ascension》回到初代之前嘅世界，Kratos要報被陷害殺死自己妻兒之仇，決意搵Ares算帳，動作表現同血腥殘忍程度足可同上集睇齊。
推出日期：2013年3月
特派記者：布偉倫
鳴謝：Sony Computer Entertainment Hong Kong