iPhone 5實測 Siri「廣」得風趣
iPhone 5明天正式開售，但網友已預測到iPhone 6、7、8……1,000嘅設計，話部電話會高過IFC，認真惡搞！歸根究柢，都係新機被批評愈嚟愈長、冇新意所致。究竟實際用上手會點？小記率先拎部iPhone 5行貨進行詳測，原來新機唔止得個長字，用4G上網、全景拍攝等都好過癮；最正係廣東話Siri可用來問天氣、賽果等，佢仲識答「唔係樣樣嘢都要畫公仔畫出腸」咁窒你，創意爆燈！
廣東話夠地道
Siri語音功能於iPhone 4S時已經推出，但當時淨係支援英文，港式英語都認唔到，嘥氣！iPhone 5內置嘅Siri終於支援廣東話，仲認到「嘅」、「囉」、「依家」等口語，說話時亦毋須字正腔圓，整體辨識率有近8成。即場試問「依家幾多點」、「聽朝七點叫醒我」等都認到；但同地圖有關嘅資料就明顯不足，例如「我想去沙田」、「邊度有戲院」都搵唔到，有待加強。
4G上網速度快
當好多手機都支援4G LTE制式嘅時候，iPhone 5亦加入多個4G LTE頻譜，但啱香港用嘅就只有1800MHz，幸好香港多個網絡商都支援相關制式。今次就拎咗Apple發布會公布嘅SmarTone，以《OFCA》Apps測試，下載速度一般都超過10Mbps，最高更上過30Mbps以上，用嚟串流睇片比3G快好多；加上新機改用16:9嘅4吋屏幕，睇高清片更加歎！不得不提是，iPhone 5採用全新nano SIM卡，比上代micro SIM卡還要細，出機前記得要上台換卡喇！
全景拍攝強勁
新機的拍攝功能亦有所加強，雖然鏡頭維持800萬像素，但改用iSight鏡頭，有效減少低光環境下的雜訊。小記試拍時，無論反應和成像都表現理想。另首次加入全景拍攝模式，只要將機身緩緩向橫移，即可影出全景相，運算及儲存時間只需1秒左右，反應超快！比較麻煩是合成的全景相高達2,800萬像素，每個檔案超過10MB，要分享畀朋友有啲困難。而新版3D地圖亦要一提，皆因香港地圖仲未夠詳細，很多時只能顯示簡單街名和著名地標，仍需強化。
上台出機知多啲
iPhone 5如箭在弦，香港各大網絡商亦陸續發布上台出機月費計劃。以iPhone 5 16GB版本的出機價作比較，當中3香港的$298 Plan備有1.2GB流動數據用量，可說是同級較抵玩的選擇。若喜歡無限上網的話，則可考慮SmarTone $418 Plan，零機價便可帶部iPhone返屋企。但要留意，各台的月費計劃均要「硬食」增值服務，需要計算入出機成本內。
Siri妙問妙答
問：你係邊個？
答：我係Siri！
問：你有咩用？
答：幫你囉！只要你問「我可以講啲咩？」我就會話你知我可以做啲咩！係咪好勁呢？
問：你係男定女？
答：你話我係男又得，係女又得。我係男係女，同你有咩關係呢？唔係樣樣嘢都要畫公仔畫出腸嘅。
問：我好眼瞓！
答：我都有少少眼瞓呀。
問：你係咪傻o架？
答：唔知呢。
專家有Say
Lo哥：「炒價$7,500左右！」
唔少炒家都會趁iPhone 5推出時睇吓有冇得賺，但先達G-World負責人劉志剛（Lo哥）表示，今次未必炒得起：「香港屬首批開賣嘅地方，加上Apple Store、網絡商都有得出機，貨源充足自然炒唔起。估計第一水16GB版的回收價應維持在$7,500左右。」
DJ Bob：「地圖好失望！」
DJ阿Bob（林盛斌）一聽到iPhone 5換咗新地圖就係咁試，但試完大表失望：「平時揸車都會用Google Maps搵路，冇咗好唔慣呀，一定要扣分。」再試玩廣東話Siri，講咗幾次Siri竟然話「麻煩你字正腔圓擘大個口講多次」，睇到阿Bob眼都凸，話這功能Gimmick居多，不過他已表明會升級iPhone 5，話晒個芒大咗、速度又快咗。
撰文：林子聰
攝影：張群生
模特兒：Christie
查詢電話：800 908 988