狂牛平板L2800 堅跑得！

林寶堅尼大牛Murciélago或細牛Gallardo，相信好多人同小記一樣，發夢都想擁有。而其姊妹品牌Tonino Lamborghini推出的首款平板電腦L2800，集藍寶石水晶屏幕、黑鈦金屬機身及雙核處理器於一身，「上車」價不過$13,800，萬多元便滿足到牛迷多年夢想，絕對諗得過！

售價︰$13,800

超跑造型唔拍撞款

提起平板電腦，很多人立時想起一塊黑板加大芒，部部都像iPad倒模般，毫無新意。出自Tonino Lamborghini手筆、擁有歐洲血統的L2800，設計當然不可相提並論。首先，機身兩側棱角「凸」出，驟眼看猶如超跑的兩條腰線，剛勁硬朗之餘，仲非常好手感。背面更可見胎紋質感，並加入立體狂牛浮雕及「Tonino Lamborghini」名字；最正係喇叭外形恍如跑車進氣口一樣，背面睇惡形惡相，保證唔撞款！

鈦黑機殼瑞士裝嵌

新大牛Aventador採用碳纖維車身，激輕兼耐用。新機雖然用料冇咁誇，但卻如同門Spyder手機般，採用藍寶石水晶屏幕，只是Size擴大至9.7吋，耐磨防花，硬淨程度媲美林寶超跑；唯一唔好是反光度太高，車廂開燈時會睇得較為辛苦。至於機殼則採用全黑鈦金屬物料打造，硬度比一般平板強好幾倍，而且零件全經過人手打磨、拋光，之後再送往瑞士裝嵌，匠心獨運！

棱角機身夠晒霸氣，出街唔怕撞款。

500萬像素鏡頭規格只屬一般，好彩補光燈加番分。

官方沒有公布機身尺寸，但目測下厚度只有半個一毫子高度。

運作流暢公版介面

林寶超跑匹數高、扭力勁。L2800速度一樣高，配備1.2GHz雙核心處理器及Android 4.0系統，小記實測上網、打機、轉頁都十分順暢，感覺比好多Tablet都跑得。其他功能方面，兼容3G及Wi-Fi網絡，並提供500萬像素鏡頭，整體算中規中矩；但要投訴內裏沒有任何專屬內容，鈴聲、牆紙皆是公版，令人有少許失望。