1:6 Catwoman 真人咁索！

事先張揚會出齊所有主角嘅玩具商Hot Toys，當然唔會放過呢個人氣角色，就1:6 Catwoman試辦所見，不僅似足真人咁索，特製Body仲將其高挑身形盡現，難怪要大排長龍訂貨！

鏡頭下勁逼真

Anne Hathaway天生係貓女最佳人選，唇紅齒白、高挑骨架，今集仲要坐埋Batpod上陣，美艷中見硬朗，就算米雪菲花都要被比下去。Hot Toys表示，由於Anne真人眼大口大輪廓突出，令頭雕師K.A. Kim落刀時很易掌握，配合JC. Hong塗裝後，望落比其他女Figure更為神似。實物所見，Figure瓜子口面、雪白肌膚加烈艷紅唇，肉眼睇可能有少許玩具感，但鏡頭下卻如真人上身般，像真程度令人咋舌！

Figure有28cm高，雙腿仲特別加長，唔怕手長腳短。

現階段未能以真面目示人，但出大貨時面罩可以除下。

直髮容易打理

Hot Toys補充，雖然試辦的頭雕已獲Anne本人及電影公司審批，但為求盡善盡美，出大貨前還會再執；因此就算Figure的眼罩可以除下，但現階段唔可以拍攝全相住，力保神秘感。靚樣睇唔晒，好彩秀髮依然有得影，呢部分用咗植髮處理，但跟早前又短又鬈髮嘅Black Widow Figure唔同，一把秀髮猶如做了負離子一樣，順直而貼服，日後打理會容易得多。

黑超可以移前戴上，中間的位置同鼻樑位勁Fit！	經過植髮處理，All Back頭不難打理。	即使縮了胸，但上圍依然甚有睇頭！

長腿縮胸收腰

Anne真人有5呎8吋高，比好多男人都要高大，因此素體雖然由Black Widow Figure而來，但特別加長了腿部，同時照足真人比例縮胸兼收腰，將贅肉盡去，緊身衣下更見玲瓏浮凸！另外，電影中貓女身手靈活，若想Figure擺番同樣甫士難免有爆衫之虞，為此戰鬥服特別採用薄身兼高彈性嘅複合拉架物料製成，並以滴膠技術呈現出凹凸質感，又靚又堅韌，就算騎上Batpod都唔怕爆胎！

長Boot包裹小腿及腳掌後依然Slim，最重要係可除下來畀其他Figure用。	膠製腰帶唔算特別，亮點反而係滴膠下嘅凹凸花紋。	配件只有一把手槍及7隻造型手，幸好地台加入水滴紋理，感覺冇咁齋！
落訂時只需捐出$100畀UNICEF，就可得到限量蝙蝠俠面罩一個。

撰文︰陳志滔　

攝影︰譚建章

查詢電話︰2388 4677