闊別了差不多7年，新一集《Dead or Alive 5》終於登場，幾位性感女角仲大咗又索咗添!由於TECMO今次換咗新遊戲引擎執靚角色動作，細緻到連女角戰鬥時的晃動都更逼真，Close-up更見到心口滴汗，夠誘惑未？實戰時還加入可觸動場景機關的新絕招，另備有多項線上模式，唔止齋賣肉o架！
《Dead or Alive》系列向來以性感女角掛帥，不少玩家鍾意選用女角，主因是拋胸戰鬥時動感十足，所以今次開發商將這賣點進一步強化，譬如引進新遊戲引擎，令角色的肢體和動作更具真實感，尤其是左蕩右蕩的感覺，似足現場睇一樣；打得耐的話，女角更會冒汗，可睇住汗水由頸項滴到心口。衣飾方面則保持一貫吸引力，Deep V、低胸、比堅尼以至肚兜上陣，甚至會在打鬥時整污糟服飾，不過如果可以模擬埋衣衫被鈎爛，或者打到裙拉褲甩就更好！
新作登場角色有20個以上，雖然男女角色各佔一半，但明顯女角人氣較強，就算廠方搵來SEGA格鬥名作《Virtua Fighter》代表人物結城晶參戰都係咁話，睇女角Leifang着住開胸鳳仙裝打交，點都吸引過硬橋硬馬的結城晶吧！同系列另一女角Sarah亦有份參戰，但計服飾性感度就小巫見大巫。尤其是初回限定版將收錄Kasumi、Ayane及Hitomi的限定兔女郎比堅尼裝飾，夠晒Sexy。
戰鬥系統沿用一貫設計，但今集加入新攻擊技巧Power Blow，只要使出這招便可觸動場景上的獨特機關，譬如在馬戲團場景「The Show」裏面，可將對手掟入巨型小丑機關內，然後以炮彈飛人方式彈出，撻生魚咁撻。至於場景選擇極多元化，由馬戲團、激流木筏、日式庭院到福建土樓都有。遊戲模式方面，除了常見的Story、Versus、Arcade、Time Attack和Survival模式，另備有Online模式支援排名配對及大廳配對玩法，自覺未夠水準，還可收到挑戰書時拒絕唔打，或者到網上道場跟朋友作線上練習。
類 型：格鬥
開 發：TECMO Koei Games
平 台：Xbox 360
推出日期：9月25日
售 價：8,190日圓
查詢電話：2418 8896
撰文：布偉倫