初音MIKU -Project DIVA-f 刮起旋風
歌手喺紅館開Show就見得多，大家可曾想過虛擬偶像都可以開演唱會？日本人氣爆燈嘅虛 擬歌手「初音MIKU」，將於10月在九展舉行演唱會，以半全息2.5D投影技術的姿態，在觀眾面前勁歌熱舞！粉絲們如果撲唔切飛亦毋須擔心，皆因PS Vita最近有款《初音MIKU-Project DIVA-f》，收錄大量初音名曲，玩家更可以「Scratch」刮機背，為歌曲加入旋律效果。
Scratch玩法多變
作為3年前PSP作品《初音MIKU -Project DIVA》的續作，遊戲保留按鍵節拍玩法。玩家需配合音樂起伏及畫面提示，睇準時間撳出不同按鍵組合；由於PS Vita備有觸控屏幕設計，有時更需要隨音樂篤芒。不過最特別要數全新「Scratch」刮機背動作，當畫面出現「星星」符號，玩家便需按特定方向刮擦機背觸控板，玩法比傳統篤芒更多變化。此外，進階玩家可挑戰高難度的「Technical Zone」，一嘗各種按鍵Combo。
機會時間好氣氛
除了新觸控動作外，玩家在成功演奏時會累積星形計量表，一旦儲滿後便可引發「機會時間」，此時畫面會出現巨型星星符號，只要成功刮擦的話便能改變舞台效果，炒熱現場氣氛！藉着PS Vita的機能，角色更可以全新姿態顯現，表情更豐富可愛，服飾細緻度亦大大提升，同時改善如交叉光源、煙霧瀰漫等舞台效果，加埋收錄多首初音新曲，令遊戲耳目一新。
限定主機同綑裝
《初音MIKU-Project DIVA-f》屬今季重頭大作，廠方為此特別炮製PS Vita同綑裝，晶瑩白主機前後均印有原創圖案，並附送專屬屏幕保護貼及初音AR卡。然而，同綑裝在早前的預購活動中已火速滿額，好在官方備有小量存貨於8月30日在Platinum Shop發售，大家記得把握機會。而官方亦舉辦Cosplay大賽造勢，由即日起至8月29日將參賽照片上載至「PlayStation HK」 facebook網站，即有機會贏取同綑裝及初音未來香港演唱會門票。
DETAILS
類 型：音樂節拍
發 行：SCEH
平 台：PS Vita
人 數：1人
推出日期：8月30日
售 價：$419（下載版）
查詢電話：2341 2356
撰文、部分攝影：廖俊斌