消暑船河 360度天旋艇轉
城中富二代約齊o靚模、帶備紅酒，上私人遊艇大搞派對，小記不羨慕……就是騙你的。其實普羅巿民亦可經濟實惠地搞海上派對，好似小記最近便同Model租遊艇玩足全日。當中必定要推介旋轉飛艇新玩意，雖然玩法有點像單人香蕉船，但快艇拖行時，玩家能透過改變身體重心，令飛艇360度旋轉；還有雙人飛碟、高速飛艇任你玩，刺激度爆燈。
高速過彎 刺激好玩
一般租遊艇出海，來來去去只係玩香蕉船和Wakeboard，新意欠奉。WakeTim新引進的旋轉飛艇，雖然似足香蕉船由快艇拖行，但由於固定扣設於飛艇的底部中央，當被拖行飛馳時，艇頭會因水面阻力而向上升，玩家需要向前傾以防反艇；當掌握了平衡技巧後，便可挑戰旋轉花式，將身體重心由中間轉移至左或右，飛艇便會360度旋轉，仲可以邊高速過彎邊自行躍起，相當刺激；如擔心轉得太厲害會頭暈，只需配備一支船槳，便可以當獨木舟咁玩，玩法多變。
飛碟飛艇 具速度感
想刺激得來又易上手？大可試玩雙人飛碟，雖然同樣由快艇拖行在水上飛馳，但可兩人同玩，更設有充氣式椅背，就算快艇開到三、四十海里過彎都夠穩陣。而另一款高速飛艇更可3人齊齊玩，由於其底部以扁身設計，高速拖行時唔會拋來拋去，令玩家能感受極速快感。
岸上活動 節目豐富
租得遊艇出海玩，旋轉飛艇等水上活動固然是主菜，但廿多人開派對，總有人想玩完水，到岸上休息或打沙排等活動。其實各位在西貢租遊艇的話，可選擇在白沙灣或大蛇灣沙灘上岸，前者勝在近西貢，十多分鐘便可到達；後者船程接近一小時，但人迹較少，水清沙幼，更有香港馬爾代夫的美譽。
網上學花式
旋轉飛艇外國稱之為Wake Yak，不少人仲玩到出神入化，整架艇側住拐彎，想學吓點樣玩得叻，記住睇片！
網址：www.youtube.com/watch?v=PdmlZ1y33dg
同場推介：吹波波好氣Fun
想搞氣氛玩吓吹波波，大可考慮這款自動吹泡槍，槍頭設有小型風扇，只要沾上附送的波波梘液，一按便可自動吹出大量肥皂泡，好適合在沙灘玩。
查詢電話：2433 1828
詳細資料
上落船地點：西貢市中心碼頭
人數：25人或以下（星期一至五）、30人或以下（星期六、日）
租遊艇費用：$5,500（星期一至五，包食物)、$7,800（星期六，不包食物)、$8,800（星期日，不包食物）
時間：日間8小時
包括節目：遊船河、香蕉船、Wakeboard
額外收費：旋轉飛艇、雙人飛碟、高速飛艇（每項加$500）
網址：www.waketim.com