閃爍搶眼 耳機換貴潮
早幾日走訪「香港高級視聽展」，除咗即場在發燒房試聽身價過百萬的頂級音響外，亦發現今年各大廠商均推出貴氣潮款耳機。同走入試聽室嘅九成九係中年男士不同，揀這些潮款耳機大多係優皮一族和女性用家，小記即場同模特兒傾偈，佢哋不約而同地好冧Bling Bling和搶眼設計的新耳機，幾千蚊都捨得畀！
型格類：鑽石切割
見孫楊出戰時，戴住鮮艷嘅Beats Studio耳筒聽歌，以為Monster耳機一定好陽剛味？當然唔係，好似呢款 Diamond Tears便明顯為女士而設。耳罩以仿鑽石多角度切割方法設計，外形似足一滴眼淚，型格中閃現貴氣；並備有質感柔軟的耳墊加強隔音效果，睇得又聽得。而香港還會引入限量10個的黑色特別版，戴出街實唔怕同人撞。
模特兒Rainbow表示：「我揀耳機會考慮外形、價錢同質素三方面，外形當然要夠搶眼，隔音效果要好，呢款Diamond Tears就好啱我，感覺勁型。而我接受到貴少少嘅耳機，最重要係物有所值！」
大玩國旗
同廠另一款耳機Inspiration，則大玩可換頭帶設計，除咗備有Bling Bling頭帶款式外，近期代理仲引入國旗特別版頭帶。至於音色表現同樣具水準，備有主動式降噪技術，最啱戴出街聽流行曲。
模特兒Christy試聽過Inspiration耳機後表示：「真係冇諗過耳機可換頭帶，咁多選擇真係唔易揀呢！我覺得去晚會派對時戴呢款耳機就最襯。」
玩色類：尊貴粉紅
Ultrasone頂級Edition系列耳筒，音色靚、造工精細加上特別版多，聽得又睇得。雖然貴氣冇分性別，但這款Edition 8 Julia選用粉紅埃塞俄比亞羊皮製作耳墊，明顯較適合女性用家。外殼則用上稀有金屬釕製造，表面U形位更以珍珠貝製造。而音效沿用S-Logic技術，低音表現不俗。
螢光搶眼
呢款造型誇張的耳罩式耳機AKG Q701，螢光綠色外形搶眼，離遠已被它的設計吸引。加上由著名音樂人Quincy Jones負責調音，音色有保證。由於它屬鑑聽級型號，要靠擴音器先推得起，外出聽歌便需要配合微型耳擴使用。
輕便類：輕巧隔音
好多女性用家鍾情Noise Cancelling降噪耳機，AKG這款既可以摺疊收藏，音色又不俗的主動式消噪耳機K495 NC，應可符合她們的要求。其頻率響應達20Hz~20kHz，音色清澈具質感；由於採用封閉式動圈單元設計，就算唔開消噪功能，隔音效果都唔錯。
藍芽便攜
新鮮到場的Klipsch Image One Mark II Bluetooth，顧名思義加入了藍芽無線連接功能，聽歌時無牽無掛，亦係Klipsch首度進軍無線耳機市場的產品。而設計跟原有Image One耳機有少少出入，主要在於可直接在耳殼調校音量及Playback等功能，最吸引是計埋內置電池都只重190g，戴得舒服。
撰文：布偉倫
攝影：林資凱、張錦昌
查詢電話：（a）2262 1173、（b）3188 0767、（c）2723 2002、（d）2341 0811