「韓」風新寵駕到 嘗出地道風味

韓城林的鎮店大廚楊師傅曾於韓國學藝，回港後於不少韓國名店如大長今、梨花園等掌廚逾15年，對正宗的韓國風味可謂瞭如指掌，而全店所選用的食材均由楊師傅親身採購，務求保持食物的質素，如王牌之選炆牛肋骨就是楊師傅大力推介，選用韓國的牛肋骨，先汆水，再加韓國醬油、薑、大葱、黑椒、蒜蓉、韓國燒酒及日本Sake等多款醬料炆一個半小時，肉質軟腍又入味，大大煲亦只售$90，好味又抵食，讓人一試難忘。小記亦親嘗雞肉石頭鍋撈飯，雞肉醃得入味，嫩滑香口，連同炒香的冬菇絲、海藻，與珍珠米混合糯米一齊放入口，果真啖啖滋味，食到最尾又點可以錯過鍋底的香脆飯焦呢？由於鍋底夠熱，所以飯焦脆度十足，非常惹味！

用心炮製 多款特色滋味前菜

除了主打菜式，楊師傅亦會親自調製泡菜、菠菜、魚仔、薯仔等多款前菜，每位顧客光顧的時候，員工便會立刻奉上數碟自家製的泡菜，值得留意的是這裏的泡菜不設收費；如果顧客唔夠喉，想再添食泡菜？無問題！只要你向員工示意，就可以隨意添食泡菜，務求令顧客食得稱心。如果想外賣回家品嘗，幾款前菜亦只售$25左右，相當抵食。

辣純豆腐湯

用料豐富，主角純豆腐夠晒滑溜，配合鹹魚仔、蜆肉、蝦、魷魚、海帶、蘿蔔等熬製。湯不會一味死辣，散發出海鮮和蔬菜誘人的鮮甜味，愈飲愈滋味。

燒大蝦

先將海蝦開邊切，再以黑椒、麻油、韓國燒酒等製成的醬汁來燒，濃郁吸引的海蝦鮮味，讓人不禁一口接一口。

宮廷炒年糕

有別於坊間紅彤彤的韓國年糕，這款年糕加入牛肉絲、韓國魚片，再配以適量的蔬菜拌炒，年糕入口煙韌富彈性，食唔停口。

燒牛肋骨

精挑韓國牛仔骨，以韓國醬油等調味料醃製整晚，重點是醬料之中有蘋果和梨，帶出多層次的味覺享受，夠晒特別。

炆豬蹄肉

先將原隻豬手炆一小時左右，後加入多種調味料一齊翻炆，食時可以夾雜青椒、紅椒、生菜，再蘸點楊師傅自製的蝦醬及麵豉醬。

海鮮葱煎餅

以韓國米粉混入麵粉做餅底，將青口和蝦米加入蛋漿內，煎的時候加上適量辣醬，故辣度適中，香脆易入口。

炆銀鱈魚

把銀鱈魚連同蘿蔔、洋葱、紅椒等多種材料一齊炆，充裕的烹調時間，讓銀鱈魚非常入味，香味悠長。

韓城林韓國美食店

地址：尖沙咀寶勒巷27號地下

電話：2787 6088

營業時間：12:00nn~3:00pm、5:00pm~10:30pm