Volvo V60 T5港島行山安全伴旅

假日想成家人去郊外玩吓，唔想淨係野餐或燒嘢食，仲有邊度好去？其實，本港有好多行山徑，單係黃泥涌水塘一帶，已經係港島區主要遠足及郊遊徑總匯，難度有易有難，一方面可以登山從高處欣賞港島美景，亦可於黃泥涌水塘公園租水上單車玩，當然駕駛富豪（Volvo）V60 T5旅行車前往更添樂趣。

售價：$439,000

大潭郊遊徑輕鬆行

港島徑、衞奕信徑、大潭郊遊徑等熱門遠足及郊遊徑都可從大潭水塘道進入，一行人有小朋友唔想行大長途、又想體驗吓行山樂趣，不妨選擇前半段的大潭郊遊徑，全程少於3km，慢慢行、影影相，大概1.5小時便可完成，咪錶位就設在郊遊徑出口對面約50m外位置（即港島徑五段和衞奕信徑二段的入口側），入兩個鐘錶足夠有餘。大潭郊遊徑起點在黃泥涌水塘公園旁，該處設有小食亭和洗手間，打點好一切後，沿郊遊徑徐徐上山，在紫羅蘭山頂飽覽港島南區及維港兩岸景色，再沿衞奕信徑一段返回大潭水塘道便完成行程。

黃泥涌水塘划艇仔

行完郊遊徑，可以返回黃泥涌水塘公園遊覽。黃泥涌水塘歷史悠久，於1899年落成，直至1978年停用後，在1986年改建為香港首個水上公園，提供水上單車及小艇租用服務。意猶未盡的朋友，可以租架水上單車或小艇，在湖中漂泊確係寫意。大潭郊遊徑雖然位處繁華的港島區，但地方仍然偏遠，有部車點都較方便，尤其係鍾意玩Mountain Bike的朋友，旅行車更不可少。

出發前先睇睇地圖，了解行程。

黃泥涌水塘公園設有小食亭，上山前記得買定足夠飲用水。

登上水上單車前需穿上救生衣，以策安全。

V60 T5慳油好力

今次結伴同行係富豪V60 T5，旅行車夠寬敞實用，形象年輕化，充滿動感，跟以往成熟穩重嘅風格截然不同，上揚硬朗的腰線配合18吋合金輪圈，使旅行車帶有濃烈Coupe味道。動力源自2公升四汽缸Turbo引擎，導入了直噴技術，最大馬力、扭力輸出分別有240hp/5,500rpm和320Nm/1,800~5,000rpm，配合六前速Powershift雙離合器波箱，即使車重達1,568kg，在攝氏33度酷熱天氣下開「行」冷氣，沿大潭水塘道跑入陽明山莊一段大斜路仍毫不費勁，性能比不少搭配3公升自然吸氣引擎的汽車更加強勁，極速更高達230km/h；而且平均耗油量低至8.3L/100km。

多功能軚環以真皮包裹，可控制巡航、音響等系統。

錶板以雙圓形設計，各自中央還設有顯示屏。

後排空間非常闊落，放平後可騰出特大載物空間。

City Safety系統減意外

買得旅行車，很多時都係貪載物量多，V60 T5的行李箱容積便達到692L，需要時更可放平後座擴展空間，加上後座椅背裝有收捲式繩網，可防止車尾物件在緊急煞車時向前衝，起了安全網之效。另一方面，預載了City Safety系統，只要車速在30km/h內，當雷達偵測到前方有碰撞危險，駕駛者又沒有作出適當的反應，系統便會自動以全力煞車，有效減低司機因分心而發生意外的機會。目前，V60 T5的標準配備已包括巡航系統、Bi-Xenon頭燈、藍芽系統等，車價為$439,000。