多車族

筆者一名認識多年的朋友是新界某某村原居民，這位車癡的兒子亦是車狂一名，擁有幾多部車？兩父子加埋近20部吧！不用「嘩！」了，香港地好多原居民都是「多車族」，大把地方擺車，養車主要支出是──牌費！朋友喜歡吉普，兒子情迷跑車，各適其適，各有各玩。朋友多輛吉普車中，最經典是70年代Toyota Land Cruiser FJ40，一講到這部古董就口沫橫飛，不厭其煩狂數40載情，猛話Keep得好，走得爬山都得，現今無Jeep能及……但近年Jeep情減退，無添新車，不及兒子繼續「跑」。「嗱！唔關年紀大嘅事，啲新Jeep性能的確愈來愈好，既跑得又豪華，可惜吖，冇咗份Wild感，唔係幾啱Feel。」朋友鄉村長大，慣通山走，對「越野」二字十分講究，低重心、力量強的城市Jeep難飲得杯落，可以理解。兒子呢？提起跑車就沾沾自喜，車輛數目已超越父親。「跑車真係天天新款，目不暇給，咁多牌子可以細心睇、慢慢揀……」果然係朋友的兒子，同樣滔滔不絕，口若懸河……他謂，最近留意Fiat 500系列，大讚潮、跑、復古味齊全，Abarth或1.4 Sport MM版本都屬辣車，最合口味。其實今期介紹的Fiat 500 BiColor，亦有1.4 Lounge版本，車仔細細有100bhp馬力，會唔會考慮呢？