台北新Game直擊蔡依林旋風襲 Cyphers

搵代言人宣傳Online Game係好普遍嘅做法，但可以大牌到搵蔡依林（Jolin）Cosplay兼拍電視廣告，就只有剛上巿的《暴能特區 Cyphers》做得到。這款在韓國人氣爆燈的遊戲，代理Gamania日前於台北松山文創園區大搞上市發布會，Jolin更旋風式撐場，15分鐘內行Catwalk、擺甫士影相兼做訪問，速度仲快過近日打到台北的颱風「蘇拉」！

Jolin（中）進場時，有8位Cosplayers傍住。

韓國人氣王

《暴能特區 Cyphers》是由韓國Neople開發的嶄新鬥塔（DOTA）遊戲，去年得到「2011大韓民國遊戲大賞」的線上遊戲人氣獎和最優秀獎，加上在線玩家人數一直排頭幾位，足證這款於今個夏天攻入港、台的大作有料到，所以代理不惜工本請亞洲天后Jolin做代言人！可見佢着住低胸紅黑色戰衣，又型又酷，現場仲有一班型男索女大玩Cosplay，Jolin出場時就有8個遊戲角色Cosplayers傍住，幾咁架勢。

打足14個角色

新作一大賣點係遊戲角色多，韓版已經出咗30幾個角色，至於台版公測時數量會較少，初期只備有3個勢力共10個角色可揀；到今個星期六（8月4日）將會再追加多4個，當中包括Jolin所扮演的「夜之女王—特莉薇亞」，但要駕馭這角色都有點難度，需要在遊戲中以高跟鞋的刀鋒攻擊對手。據官方表示，上市初期會Keep住每兩星期追加兩個新角色，望能令玩家保持新鮮感。

發布會現場擺了多台電腦畀大家試玩攻城戰。

幾經辛苦終於攻陷敵方的主堡取得勝利！

華麗動作對戰

講番嶄新的鬥塔遊戲設計，玩法係將10個玩家分成兩組，互攻對方的主堡，打爆對方主堡為之勝出。而新作標榜為結合華麗動作的線上遊戲，因此每個角色都有連招，兼且可做出空對地、地對空攻擊，打擊感強烈。而且《暴能特區 Cyphers》的角色一開始已用得晒所有基本招式，之後仲可以升級賺錢買道具，最特別是等級高未必一定「屈機」，被敵人包抄的話隨時唔夠打，好講隊友之間的合作同策略。遊戲最初在韓國推出時只有攻城模式，但今次一推出已有齊協力模式、一般模式、積分模式同跟電腦對戰的PvE模式，如湊唔夠腳都可以玩PvE模式同電腦開戰，幾啱香港玩家！