炒股軟件幫到幾多？

TSCI幫手揀靚股

陳：趨勢研究執行董事陳玉炯

彩兒：當初你點樣研發出TSCI呢套軟件o架？

葉培元

散戶CK

陳：我記得喺八十年代初炒股嘅時候，仲係用緊Lotus123（Excel前身）記數咋，但個市場跳得咁快，我哋根本追唔切價位變動，所以就萌生起研發炒股軟件呢個念頭，等自己可以方便炒股囉。我於八六年正值恒指期貨開鑼時推出TSCI炒股軟件，當時的軟件需求相當殷切，但隨後一年發生股災，人人都炒唔到股，咁我咪索性專注銷售軟件！

彩兒：但係以前係人手操盤的年代，唔多人有電腦o架喎！

陳：所以嗰時會買軟件的，大多是證券行老闆！

成交上八百億才旺市

彩兒：你賣咗軟件廿幾年，軟件需求係咪好受市況影響？

陳：旺市嗰時當然唔使擔心生意額啦，但依家個市每日只得數百億元的成交額，證券行的數目又愈來愈少，我哋自不然少咗好多客源！我諗個成交額要上番八百億元樓上，市道先可以好啲！

彩兒：你套炒股軟件發展咗廿多年，中間有咩變化呀？

陳：以前的發展環境好好多，因市場上的競爭不多，所以我哋公司的產品可謂有價有市，當時起碼要兩、三萬元才可買到呢套軟件o架！不過，依家資訊發達，港交所仲要提供免費報價系統，市民要獲得股票資訊已相當容易啦，所以我哋要不斷求變去吸引客戶。近期便推出了「傻瓜版」選股功能，可借助軟件自動幫股民搵股，是為「一剔選股」。

彩兒：哈哈，傻瓜選股？如果可以羸錢的話，做吓傻瓜又有咩所謂！

陳：因為市場上有成千幾隻股票，訊息既多且亂，股民自然會眼花繚亂啦，所以呢個選股功能可以揀出不同條件的股份，好讓大家可以重點留意相關股票呀！

電資訊發買賣訊號

葉：電資訊高級營業經理葉培元

高妹：電資訊有好多捧場客喎，你哋怎樣幫助股民炒股呀？

葉：公司的客戶以散戶為主，大多鍾意炒即日鮮，所以佢哋好看重每日的價格波幅o架，目標係賺兩三個價位，特別需要能夠提供買賣訊號的資訊技術，藉以幫助分析大市！

高妹：你點睇炒股軟件的發展趨勢？

葉：無疑軟件的發展趨勢會愈做愈複雜，因為股票數目日多，資料數據庫就要夠大先可以配合。不過，依家的股票多逾千隻，股民日日都玩緊大海撈針，所以炒股軟件將會着重篩選功能，主力幫助投資者揀取重心股票呀！

股民續增帶旺需求

高妹：依家愈嚟愈多行家推出炒股軟件，競爭似乎愈來愈激烈！

葉：競爭呢家嘢就每行都有o架喇，我們自然亦不例外！不過，我對炒股軟件的發展前景樂觀，因為市場上不斷有投資者湧入，軟件需求愈來愈多，只不過同時亦多咗供應商參與，咪變成個「餅」（軟件需求）雖愈做愈大，但多咗人去分嘅時候，咪人人都分少咗囉！

高妹：咁你哋幾時分得最多「餅」先？

葉：當然係八十年代尾初初推出軟件嗰時，因為以前的資訊透明度好低，只得路透社、道瓊斯等公司才可提供股票報價系統，而我哋就將報價服務平民化，把股票資訊帶到散戶層面，所以當時的生意係特別好o架！

Metastock速度快易用

張：輝立證券電子交易部主任張永堯

劉：輝立證券電子交易部主任劉金玉

彩兒：點解你哋會從美國引入Metastock？

張：眾所周知，美國的軟件技術水平係首屈一指，加上Metastock喺美國發展多年，功能配套完善，所以我哋引入呢套軟件幫助本港的投資者炒股！

彩兒：普遍來說，散戶對炒股軟件有咩要求？

張：現在散戶多要求方便易用，最好係一睇就明，唔使專登去學點用呀！不過，每位投資者都有自己的獨立投資方法，佢哋希望軟件能夠符合自己要求！

劉：仲有呀，速度亦是重要因素，如果軟件的處理時間太耐，將會影響投資者的判斷，另準確度也十分重要，因技術指標是買賣訊號的根本，若然軟件上的技術指標出錯，便會影響到投資者作出買賣決定！

買軟件要睇售後服務

彩兒：市場上的炒股軟件林林總總，股民需要注意甚麼？

張：由於每個客戶的炒股方式不同，所以各人的要求亦有異，應選取一些適合自己的軟件，如散戶的投資策略注重Back-testing（回溯測試），便應選擇Back-testing功能較強的軟件。

劉：投資者亦要注意供應商的背景歷史，因為間公司會唔會keep住發展，以及會唔會持續推出新技術，都係判斷軟件品質的關鍵因素，另亦要留意公司的售後服務，因電腦軟件始終係死物，或會出現異常情況，所以客戶服務的即時性好重要。

用家分享：掃齊三套軟件傍身

高妹：你炒股炒咗廿年，咁你幾時開始用炒股軟件？

CK：電腦於二○○○年時開始普及化，我記得我喺同年添購炒股軟件o架。

高妹：你現在總共擁有TSCI、電資訊及寶盈三套港股軟件，好「重皮」喎！

CK：係呀！由於佢哋各有各特色，我咪買晒三套軟件囉！TSCI最貴，但內裏提供的指標比較特別及專業；電資訊就有齊國際性的技術指標，加上我哋可以因應市況而設置一些個人化的指標；至於寶盈就係內地的股票軟件，價錢最便宜，每年只需三千港元也可看到港股資訊，亦能提供一些獨特指標幫助分析大市！

高妹：咁你曾否遇過軟件出現誤差的情況呀？

CK：一定會有誤差o架喇，但好彩個程度好輕微，對我無乜太大影響，普遍嚟講都好穩定！

高妹 彩兒

若有料報畀高妹同彩兒或有嘢問，可電郵money.biz@opg.com.hk