Xperia acro S 1米防水攝獵

夏天到沙灘戲水，當然要留影一番！奈何防水攝影Gadgets選擇有限，想濕身影相唔通真係要買部防水DC？Sony剛發布嘅Xperia acro S智能手機可說是新選擇，11.9mm纖薄和風機身，竟支援IP57防塵防水標準，掉落1米水深都可以照用；加上超班的1,200萬像素鏡頭，影番輯水底沙龍都掂！

售價：$4,598（8月3日推出）

纖薄防水設計

以往的三防手機，一般又老套又大舊，外形認真麻麻。Xperia acro S突破呢個框框，修長和風設計，備有黑、白、粉紅3種配色，靚仔程度拍得住同門嘅Xperia S。最重要是手機支援IP55及IP57防護等級認證，IP後第一個數字是指防塵等級，「5」代表可以抵禦灰塵入侵，拎住佢插沙都冇問題；而第二個數字代表防水等級，「5」指能抵受低水壓水柱直射，而「7」表示手機可於1米水深下正常使用30分鐘，換言之拎住部手機洗白白傾電話都得！

1,200萬像素鏡頭

防塵防水咁耍家，新機連攝影功能都大幅強化，備有1,200萬像素鏡頭，亦內置Exmor R感光元件及1.5秒極速拍攝，影日景夜景都唔失禮！小記即場拎佢做潑水測試，發覺機面滿布水珠都可以篤芒影相；不過落水後因為受水流影響，篤芒即時用唔着。好在機身另備有實體快門鍵，長按2秒可即時啟動相機，亦支援半按對焦功能，水底拍攝勁Easy；而鏡頭更可攝錄1,080p影片，功能絕對超班。

支援IP57防塵防水標準，插沙、落水都頂得住。

機身設有實體快門鍵，落水影相更易操控。

機背微微拱起，手感不俗。

升級Android 4.0系統

影相咁靚，冇個靚芒取景一樣嘥氣，因此新機採用4.3吋屏幕，不但解像度達1,280×720，更支援Mobile BRAVIA Engine功能，對比度高、色彩冇味精，用來睇相、煲劇極為像真！最抵讚是新機出廠時已預載Android 4.0系統，配合1.5GHz雙核心處理器和1GB RAM，不但換頁、操作更順暢，還預載Walkman音樂播放器，靚仔得嚟都幾實用。值得一提，隨機會附送一個充電座，讓用家充電時唔使成日揭開保護蓋，好貼心！