自資出書！ 圓作家夢有計

謎團1

聽人講自資出書要印幾千本，印二、三百本得唔得？係咪有文稿就可以出書，通常要搞幾耐？

解密：

始終出書唔係用File夾埋一堆紙就搞掂，一開印刷機便要有一定印量。專門幫人自資出書的三次坊出版執行編輯Andson解畫，雖然最少可印300本，但就算全數售出，都一定蝕大本。他表示：「如果印1,000本兼全數賣出，大約可接近收支平衡；想賺到錢的話，建議最好印2,000本。」收費方面，印刷300本書加其他編輯校對費用要二萬多元，印夠1,000本的差額都只是數千元。

「其實只要文章及封面一早搞掂，最快只需兩至三星期便可印好。」Andson續說，如各位想趕喺書展時出書，其實未必有着數，「書展期間，作家、藝人等都出書，就算寫得幾好嘅新進作家，都未必有能力在書架上佔一席位；而且出版社的宣傳大多落在大牌作家身上，所以出版時間沒有一Hit即中的方程式。」

謎團2

既然我係作者，內容係唔係冇限制，想出繪本、影集或詩集得唔得？

解密：

Andson指，找他們出書的人主要分兩類，其一是對自己的文章好有信心，但出版無門；其二是曾被「彈稿」，所以要自己出書。「好多時自資出版的作者，都不太了解市場運作，須知道要讓書本接觸到讀者，首先要過書局買手的一關，若果內容題材唔吸引，無法上架的話，自資出版的過千本書隨時會堆喺屋企。雖然我哋嘅意見未必100%等同市場，但就算作者想出繪本或詩集都好，我哋都會跟他研究內容、封面及美術設計，盡量迎合市場要求。無論係作者或者我哋，都唔想本書唔好賣。」

謎團3

如果只係想印一本相集，可以怎樣做？

解密：

如果想印一本相集，最簡單和直接的方法是以Mac機，使用《iPhoto》軟件的製作相簿功能。相簿大細有唔同尺寸、硬皮或軟皮封面選擇，然後大家可以對住部電腦，自己排版揀相及加入圖片說明，完成後上傳就搞掂。幾日後便可到沖曬店拎這本自製相集，非常方便。收費方面，想印本11×8.5吋的硬皮封面相簿，最低消費為$235，但只有20頁，每印多一頁多加$7.7；如果想經濟啲，揀軟皮8×6吋尺寸，20頁消費為$79，每印多一頁只係畀多$3.8。

謎團4

近年eBook大行其道，對於想自資出「書」嘅新手會唔會容易啲？

解密：

首尚文化（Handheld Culture）電子書店出版總監一方認為出eBook的成本比實體書低，「作者只要交齊文字PDF檔案、封面圖像檔，便可以3天之內上架；而且最平只需二千多元便能推出自己的電子書。內容方面，某程度冇太大限制，沒有犯法、色情內容即可，推出小說、散文、繪本或互動作品都得。」拆帳方面則要視乎作家、時間等，通常版權會係3至5年，要個別商議。

項明生分享：最緊要有趣

3年前項明生自資推出旅遊書《足足五千年》，市場大為受落，今年書展期間更推出電子版《十天敢動假期：墨西哥、古巴》。James憶述出版實體書時，自資付印刷費、設計及排版，連分銷門路都是自己叩門，「當時是一種試驗，但有麝自然香，賣得到便陸續有人搵你出書。」談及出版電子書經驗，他表示校對時間會較快，而且成本較低，「坐艇」機會較少。「但電子書的規格、讀者群和內容，跟實體書有啲唔同，實用性或支援語言發聲功能的類型會較受歡迎；而且eBook讀者群比較後生，唔會睇太悶嘅書，結合多媒體互動如GPS、影像等會是潮流所趨，全文字會好沉悶！」

撰文：布偉倫

部分攝影：張群生

模特兒：Cherrie Tam（M.Spy Model）