東京直擊！挑戰面書可愛公仔LINE關係

4,500萬人使用

在東京商場搭扶手電梯時，見到幾個少女用緊《LINE》打字加公仔，可見這App在日本幾咁流行。據官方數字，由2011年6月推出以來，《LINE》在1年時間便吸引了全球4,500萬人下載使用，其中日本便佔了2,000萬人，增長速度快過twitter同facebook，預計下半年攻入美國同內地市場，用戶將去到1億人，香港用家又點可以唔玩呢！這App由日本開發，設計風格自然貼近亞洲人需要，好似可以在《LINE》或《LINE Camera》加入可愛到震的「饅頭人」、「熊大」或「兔兔」Stickers，近期更推出官方帳號系統，可以第一手接收到日、韓及台灣等偶像的消息，Hit中晒年輕人口味。

LINE Channel打機

發布會由指示牌、擺設到演講時的過場動畫，都由「饅頭人」、「熊大」同「兔兔」這3個可愛角色代勞，非常搞鬼！「LINE Channel」可說是一個「乜都有」的智能手機頻道，加入如Game Center的LINE Game功能，可以同朋友一齊玩原生手機遊戲，頭炮將會移植韓國爆紅遊戲《Birzzle》，而好多大廠如Konami、Square Enix，甚至乎Rovio都係首批推出LINE遊戲的公司，莫非將會有LINE版「憤怒鳥」？另一個新功能LINE Novel已於上月底在日本推出試用版，以對話泡泡形式講故事，推出首兩天已有10萬人登錄睇《Refrain》小說！其他功能還有具占卜功能的LINE Fortune、可下載食肆優惠券的LINE Coupon同上網買歌的LINE Sound Shop。雖然以上功能將於7至8月推出，但始終唔少功能都係跟日本廠商合作，香港幾時有得玩都未知。

紀念品「饅頭人」、「熊大」跟「兔兔」角色公仔甚搶手，出面都未有得賣！	發布會在涉谷新地標Hikarie舉行，有近300名日本、香港、台灣等地區媒體參與。	細位設計有心思，Sticker化身成場內指示牌，連工作人員手上的樽裝水都貼上LINE標誌。

全方位社交功能

新社交網絡功能「LINE Home」同「LINE Timeline」已陸續在不同地區包括香港推出，大家可直接理解為一個簡化版的facebook，正如廠方明言，挑戰facebook是它們的目標。「LINE Home」容許用家設計《LINE》主頁，可更新個人Status之餘，亦可以瀏覽朋友的主頁訊息，更可結合《LINE Camera》影相貼圖，比facebook先進的地方是不再設「Like」掣，而是用表情多端的「饅頭人」公仔表達自己的睇法，「憤怒了」、「葡萄了」的表情都做得出；至於「LINE Timeline」的設計跟facebook Timeline相近，可預期好快又有新搞作出籠！

大會簡報加插了大量有趣貼圖，是小記去過最可愛的發布會。

1年內吸客4,500萬人，跑贏twitter同facebook呀！

日本LINE追星

《LINE》其中一個吸引年輕人的玩法，是可加入官方帳號追貼明星消息，甚至有機會跟偶像傾偈。不過香港官方帳號多是台星如安心雅、丁噹等，韓國方面雖然有Wonder Girls，但點都唔及日本官方帳號咁精彩，如有GACKT、倉木麻衣、鈴木奈奈等。其實只要在國籍一欄揀日本，便可加入日星帳號，不妨一試。

特派記者：布偉倫

鳴謝：NHN Japan