龍遊全港

扮鬼扮馬 熱鬧赤柱

香港人自小受西方文化薰陶，傳統不足，勝在創意補救，好似赤柱嘅國際龍舟錦標賽，更將萬聖節扮鬼扮馬嘅好玩元素融入其中，世界各地超過5,000個參賽者不但要比併身手速度，更要鬥造型爭奪「最佳服飾獎」。由往年圖片所見，參賽隊伍打扮出色，海盜、忍者、清兵等Cosplay團隊滿場飛，就連阿凡達星人都專程來港參賽（唔知藍色顏料落水後會唔會甩色呢？），唔單止扮嘢嘅玩得開心，連作為觀眾嘅香港市民都睇得特別投入，為呢個一年一度嘅傳統節日添上好玩時代色彩。

除咗龍舟比賽，端午節當日嘅赤柱亦猶如嘉年華會般熱鬧，赤柱大街上有多個傳統手工藝表演及攤位遊戲，赤柱廣場有大型音樂會，表演單位唔止有本地及外國歌手、樂隊，更有森巴歌舞和非洲鼓等精彩項目，要滿足一家大細，過一個好玩應節嘅端午節，赤柱應該係不二之選。

赤柱國際龍舟錦標賽

日期︰6月23日

時間︰8:00am~6:00pm（龍舟比賽）

12:00nn~7:00pm（森巴歌舞表演）

地點：赤柱正灘（龍舟比賽）

赤柱廣場（森巴歌舞表演）

赤柱大街（傳統手工藝表演）

查詢︰2813 0564

網址︰www.dragonboat.org.hk

龍舟遊涌 巡遊大澳

如果你不好玩樂，只想深度感受端午節嘅傳統氣氛的話，我會推介你去大澳參加「龍舟遊涌」。有百多年歷史嘅「龍舟遊涌」始於19世紀，相傳當時大澳發生瘟疫，當地漁民便將各廟宇嘅神像接到小艇，並於水道巡遊，其後瘟疫得以驅除，而端午「龍舟遊涌」活動亦成為每年一次嘅習俗。

今年嘅「龍舟遊涌」由扒艇行、鮮魚行及合心堂3個大澳漁業行會舉行，各成員先於初四早上到楊侯廟、新村天后廟、關帝廟及洪聖廟迎接神像並安置於「龍躉」（臨時宗教場所），再於初五早上用龍舟拖着載有神像嘅小艇巡遊各水道，沿途焚燒金銀衣紙，保佑居民平安；游涌完畢後，3艘龍舟會進行比賽，用以娛樂神明，下午左右就會將神像送返各廟宇。雖然刺激與新意欠奉，不過每年嘅「龍舟遊涌」都十分熱鬧，皆因該活動全港獨有，而且體現大澳嘅漁業歷史、社區獨特性及宗教信仰等，難怪活動於2011年被列為「國家級非物質文化遺產」。

大澳端午節「龍舟遊涌」

日期︰6月23日

時間︰8:00am~2:00pm

地點：大嶼山大澳各水道

查詢︰2985 7229

網址︰www.tai-o.hk

香港仔 大龍下水

端午節當日嘅大型活動前，事前準備工夫當然唔少，香港龍舟競渡大賽委員會於6月18日就舉行咗傳統嘅大龍下水儀式，祈求端午節賽事及來年風調雨順，儀式包括祈福、醒龍及放紙龍，顯示出漁民對端午扒龍舟嘅傳統甚為重視。「香港仔龍舟競渡大賽」將於端午節當日舉行，同場亦有放紙龍及迷你紙龍工作坊等親子活動，想感受大龍舟競渡嘅氣勢，非香港仔莫屬。

香港仔龍舟競渡大賽

日期︰6月23日

時間︰8:30am~4:00pm

地點︰香港仔海傍道海濱公園

撰文︰吳倩瑩