1,200萬像素Xperia ion鎂鋁好色

近年大芒手機大行其道，唔止男人Buy，連不少女士都Like。然而，目前大多大芒機只有800萬像素鏡頭，加上外形笨重，拎出來Snapshot始終唔夠「照」！幸好日前Sony為市場注入新選擇，Xperia ion像素高達1,200萬，兼且有個4.6吋高清出色靚芒，以及一體成形鎂鋁合金機身，由內靚到外！

Sony Xperia ion 售價︰$5,198

用料矜貴硬淨

巿面上的大芒手機空有闊屏幕，外形死板之餘，還大多採用塑膠殼，用料認真一般。向來愛出美形手機的Sony要向此說不，Xperia ion不但「愛鬥大」，將屏幕由Xperia S的4.3吋加大至4.6吋，還採用一體成形鎂鋁合金機身，並在微拱機背加入髮絲紋理，好拎得來用料矜貴，比對手多了幾分專業味道。屏幕夠大，解像度亦達1,280×720高清質素，加上亮度、像素密度分別達500cd/m2及319ppi，黑位夠層次；最重要是Bravia屏幕出名色準冇味精，睇相分外出「色」！

鯨吞98GB容量

有個靚芒，但若鏡頭渣都冇用。新機另一強項是擁有1,200萬像素鏡頭，並對應Exmor R影像處理器、F2.4大光圈及1.5秒極速快門啟動，至啱室內或夜晚Snapshot！小記於室內測試影相功能時，發覺對焦速度極快，唔落閃光燈都影到清晰畫面，最抵讚係雜訊唔多，表現令人滿意。另外，上代Xperia S不設記憶卡槽，搞到影相要就住就住，為此新機追加microSD卡槽，若插張32GB記憶卡，夾埋16GB內存和50GB Box雲端空間，總儲存容量可達98GB；莫講話高解像度相片，就算拍幾多1,080p高清片都擺得落。

現在行Android 2.3系統，廠方表示日後可免費升級至Android 4.0。

現在行Android 2.3系統，廠方表示日後可免費升級至Android 4.0。

提供microUSB及HDMI輸出介面，並備有保護蓋。

要打開機頂兼套入Adaptor，才能更換microSIM卡！

Android系統有待升級

新機未發布前，一直盛傳會採用Android 4.0系統並支援4G，但日前推出時，機內只預載Android 2.3，而且LTE頻譜僅對應美國AT&T，除非漫遊，否則根本在香港用不到4G。然而，廠方表明日後會提供Android 4.0免費升級；而且機身一體成形冇得換電，網絡毋須在3G/4G之間切換，反而對慳電更有幫助。處理器方面，則沿用Xperia S的雙核心1.5GHz，難怪轉頁、上網、睇YouTube都咁順暢！