Iconia Tab A510四核喪玩15小時

記得四核心平板初推出時，叫價近$5,000，莫講話貴過iPad多多聲，呢個價錢連Notebook都買到，定位尷尬。幸好近日Acer推出奧運別注版Iconia Tab A510平板電腦，10.1吋機身改玩Tegra 3四核心處理器，三千幾元有交易之餘，仲加入9,800mAh高容量電池，續航力長達15小時之久，速度與耐力兼備！

售價：$3,898

Acer Ring介面

記得上代A500早以平價為賣點，$4,000有找的價錢，已有齊當時最強的Tegra 2雙核心處理器和Android 3.0平台。今次A510以相近售價，引入更快更省電的Tegra 3四核心處理器，時脈達到1.3GHz，效能快上一截之餘，同時配備Android 4.0平台及Acer Ring自家介面。在任何情況下，用家只要一按畫面下方的Ring按鍵，即會彈出環形介面，想開網頁、睇相片等都可以一「篤」到位；另支援新一代Dolby Mobile 3+環繞聲音效，配合1,280×800解像度靚芒睇片，猶如拎住個10.1吋流動影院出街，可說是集Acer的撒手鐧於一身。

685g輕巧機身

外形方面，雖然新機與上代同為10.1吋Size，但首次提供銀色和黑色機身選擇，配以輕巧纖薄設計，重量只有685g，觀感更討好之餘，拎出街玩Apps、睇片都唔怕攰。最重要是內置電池備有9,800mAh容量，一般使用足夠玩15小時咁耐，性價比十分高。此外，新機預載的軟件比同級Android 4.0平板完善得多，不僅備有《Acer Clear.fi》分享工具、《AUPEO!》網上收音機、《Polaris Office》文書應用等，連《McAfee Mobile Security》保安軟件都有埋，讓用家毋須擔心受惡意程式侵襲。