近期大作一浪接一浪，今個禮拜輪到《Ghost Recon Future Soldier》上場。玩開《Ghost Recon》系列槍Game都知道，佢着重戰術同潛入，鬥智兼鬥力。今集叫得做「Future Soldier」，當然有啲未來科技畀大家玩，例如有得戴起Cross-com眼鏡，睇晒戰場嘅資訊，最搞鬼係可以着住「你睇我唔到」嘅隱形戰衣，潛入敵陣靠晒佢！
新作以未來士兵為主題，當然有最新科技產品畀各位用！在單人劇情模式入面，玩家扮演小隊的John Kozak中士，孖住3位隊員執行任務。同其他遊戲唔同，3個隊員都非常專業，唔會阻手阻腳之餘，仲可以透過新增嘅同步射擊系統，Call齊隊友瞄準唔同目標，夾啱時間開槍擊殺敵人，好似第一關已經要同一時間做低4名槍手救人質。另外，今集有得玩Cross-com戰場通訊裝置，戴住佢就可以在眼鏡睇晒戰場情報，邊個區域有埋伏、同目標距離有幾遠，全部一目了然。
玩家仲可以着住件具有隱身功能嘅光學迷彩戰衣上陣，一撳掣便會於兩、三秒內自動與場景融合！不過呢件隱形戰衣使用上有一定限制，隱身時唔能夠高速移動，亦唔能夠開火，行得近仲會被敵人發現。今集劇情模式共收錄8個場景、共12個任務，每個場景都設計得幾有特色，可以去非洲沙漠打軍閥、北極冰天雪地作戰等，仲可夾埋3個朋友連線組隊打「50波」游擊戰模式，玩法都幾似《Gears of War》。
至於正式多人戰模式，可支援6對6作戰，讓玩家自由選擇步兵、工程師或偵察兵出戰，有4種模式及10張地圖可揀，當中包括經典嘅「Siege」圍城模式。而今集喺武器系統方面搞咗唔少Gimmick，新增嘅Gunsmith改槍模式，便可畀槍迷過足改槍癮。傳統槍Game只得現成武器畀大家用，最多只可加裝瞄準器、滅聲器等，但新作除了備有幾十種手槍、霰彈槍、衝鋒槍等，更配備大量扳機、槍管、槍托等Parts畀大家改裝，可組合出超過2,000萬種武器。而且PS3版和Xbox 360版都支援體感改槍，更可用埋Android或iOS裝置下載《Ghost Recon Network》睇戰績添！
類型：第三身射擊
開發：Ubisoft Paris
平台：PS3、Xbox 360
售價：$388（PS3）、$359（Xbox 360）
查詢電話：2359 7998
撰文：布偉倫