5吋Optimus Vu拼貼型男韓星

2PM、Super Junior、東方神起、張根碩……齋聽到班韓國型男嘅名字，香港妹子已經依嘩鬼叫！可惜香港能真正接觸K-pop嘅機會唔多，最近LG推出的Optimus Vu夏日韓Phone，就畀個「餐士」大家，佢內置《LG Reader》可追貼韓國八卦雜誌，韓星、美容資訊一撳睇到；配合埋5吋巨芒及拼貼畫筆功能，簡簡單單就整到追星日記！

售價︰$4,580

大芒猶如鏡盒

韓國大芒機近年勁受女生追捧，Samsung一部5.3吋GALAXY Note，去年驚人地賣出1,000萬部。LG Optimus Vu視Note為假想敵，其屏幕亦有5吋之巨，只是比例不屬傳統的16:9，改玩接近正方形的4:3，望落成個鏡盒咁破格！屏幕更採用IPS面板，比TFT屏幕擁有更高對比度、可視角度及色域，加上不易反光，在130萬像素前置鏡頭下，連Model都話用嚟照鏡、自拍勁方便！

強化畫圖功能

Note咁多人買，支援畫圖係原因之一。新機跟到足，內置《Notebook》應用程式，用戶可在此畫公仔、寫便條，其筆頭更提供不同粗幼、顏色及透明度選擇，啱晒喜歡《Draw Something》嘅女生。畫畫以外，它還可匯入相片、影片、聲音甚至GPS位置，粉絲們可自由拼貼偶像靚相和MV，然後經電郵分享畀「絲打」！另外，Note擷取圖片時要抽支筆出來，Optimus Vu更為方便，機頂設有「QuickClip」小圓鍵，一撳便能擷取畫面，之後便可直接寫字，啱晒大頭蝦用來記事。

機背帶點皮革質感，左上角是800萬像素鏡頭。

機頂設有「QuickClip」小圓鍵，一撳便能擷取圖片。

一體成形設計冇得換電，而microSIM卡要由機側插入。

閱覽韓國雜誌

女生揀手機最緊要易用，新機以1.5GHz雙核心處理器推動Android 2.3系統，無論上網、煲劇定打機都相當流暢。其介面更是新版Optimus UI，不但將每列程式Icon加至5個，讓用戶毋須經常轉頁，還提供聽歌播片用的《Media Home》，以及睇電子書用的《LG Reader》等自家Widgets；當中後者定期提供韓國雜誌，讓大家緊貼星蹤及美容資訊。惟要留意一點，由於屬水貨關係，此機不設中文輸入法，入手後記得叫男友裝番！