倫敦直擊！GALAXY S III GaGa隨傳隨到

以前用手機，多數同人煲粥傾心事，但由今日開始，對住手機開聲可以用來落Order！Samsung剛於倫敦發布嘅GALAXY S III，透過「S Voice」語音功能，開句聲便能撥號、查天氣兼搵資料，現場問「Who is Lady GaGa？」佢即刻搵出天后相片同資料。此機更採用4.8吋HD Super AMOLED屏幕及1.4GHz四核心處理器，4G版最快暑假有得玩，機迷係時候儲定錢入貨了！

8.6mm纖薄高雅

唔知由幾時開始，Samsung GALAXY系列就像波鞋界嘅Air Jordan一樣，一出必定大賣，當中S II更在10個月內賣出2,000萬部，成為2011年年度機王。來到2012年，另一機王S III終於誕生，此機跟上代玩棱角不同，渾圓機身的厚度僅8.6mm，並提供大理石白及卵石藍兩色，配合具拋光感的Hyperglaze機殼，不但比以前好手感，還帶有幾分高雅味道。屏幕亦由4.27吋跳至4.8吋，並支援1,280×720解像度，睇片一流。新機更備有「Pop Up Play」功能，睇片時可把畫面置頂，並同時進行其他工作，猶如電視畫中畫功能！

S Voice聲控又快又準

外形靚爆，功能亦非常出位。新機支援全新「S Voice」語音辨識功能，各位只要開句聲，系統便會幫你查天氣、搵資料、控制音量、發送短訊，甚至叫停鬧鐘。小記現場試玩時，隨口講句「Who is Lady GaGa？」毋須3秒已能搵出她的最新相片及資料；若說「Take a Picture」，它仲識得自動開啟相機快門，過程中一粒掣都唔使撳，懶人必備！這功能還可與體感操控結合，在寫短訊時只要把手機舉到耳邊，它便能自動撥號給收訊人，毋須跳出Menu慢慢搵！惟留意它暫時只支援英、德、法、意、韓等8國語言，期望日後能追加廣東話及普通話啦！

GALAXY S III備有兩色選擇，售價待定。

預載最新Android 4.0系統，並改用新版Nature UX TouchWiz介面。

預載最新Android 4.0系統，並改用新版Nature UX TouchWiz介面。

鏡頭僅得800萬像素，但內置喇叭好夠力水。

鯨吞128GB容量

硬件方面，S III屬Samsung的四核頭炮，時脈達1.4GHz，配合1GB RAM，就算行Android 4.0系統依然順到爆！容量則有16GB、32GB或64GB選擇，而且唔似其他對手玩一體成形冇得插卡，它最高支援64GB SDXC卡，令總容量可攀升至128GB，幾多高清片都吞得落！惟鏡頭得800萬像素唔算高，但支援20張連拍及「Best Photo」自動揀相，反而前置鏡頭達190萬像素，自拍就更加清楚！新機還對應「S Beam」，只要跟其他S III機啪一啪即能互傳資料，比用藍芽或Wi-Fi更方便！至於推出日期，3G版最快5月29日在歐洲上市，4G版則延至今年暑假面世。