射擊遊戲幾乎隻隻一式一樣，除非係大熱作品嘅續集，唔係好難吸引到玩家「轉會」，所以下星期推出嘅PS3獨佔第三身射擊遊戲《Starhawk》，便大搞新意思，換上科幻背景之餘，仲引入類似即時戰略遊戲嘅「建設與戰鬥」玩法，要靠搶奪能源和製造武器同載具，才可以扭轉形勢，唔止射射射咁簡單！
《Starhawk》的前傳是4年前推出嘅《Warhawk》，玩法以第三身射擊進行陸空對戰，用上40年代二戰為背景，最耍家係可以PS3無線手掣六軸控制戰機。來到《Starhawk》，其最大轉變係將舞台轉成未來，場景為一個蘊藏新能源的「塵星」，但這種能源令人類突變成具有異能的種族，好似主角艾梅特‧葛雷夫便具有超人力量。各人為咗生存，既要繼續發掘這能源，又要同另一班外星種族對抗！
遊戲中嘅能源唔係得個「睇」字，而係可用於起建築物、生產武器和載具等，完全係即時戰略遊戲嘅玩法。不過《Starhawk》呢類射擊遊戲，講求刺激同快感，玩家邊有耐性等建築物和武器慢慢生產，所以遊戲入面新增「建設與戰鬥」系統，無論興建攻擊敵人嘅「自動機槍台」、保護自己嘅「防衞牆」、設置重生點嘅「前哨站」等，只要決定咗地點後，建築物便會從天而降，幾秒內搞掂。而擊倒敵人和打爆地圖上的能源桶，都是取得能源嘅方法。
新作好玩的地方，是可以生產大量載具，尤其玩多人戰時，除咗要攀山越嶺去到敵陣搶旗仔，仲要衝出重圍返回自己地頭，這時候揸架噴射機車便可高速移動；如生產吉普車，仲可以載多兩個步兵移動，甚至可以生產噴射背包，孭上去便可進行空中攻擊，感覺都幾型！至於單人任務，講主角成為僱傭兵返回母星打仗，還以主角跟哥哥兄弟情仇為主軸；而連線模式則可支援32人對戰，仲可以累積經驗值提升技能，比起一般射擊遊戲更過癮！
類 型：第三身射擊
開 發：LightBox Interactive、SCE Santa Monica
平 台：PS3
推出日期：5月8日
售 價：$388
查詢電話：2341 2356
撰文：布偉倫