自從去年311大地震後，我三日唔埋兩日就收到類似訊息：「May，我想去日本玩，但東京現在安全嗎？」、「日本啲嘢食得未？」、「東京會唔會再有地震？」縱使災難過去已一年多，相關的問題仍是大量殺到，而提問者更不乏有識之士，實在叫我啼笑皆非。
可能大家太睇得起我，自己其實只是一件喜歡到日本旅遊、靠寫幾隻字搵飯食的良家婦女，既不是醫生又非食物安全專家也不是科學家，對核輻射一知半解，更遑論可扮先知預測世界大限期？況且我經常強調，日本從來是個地震國，旅行前應做好大地震來臨的心理準備和應變措施。或許朋友總找不到權威人士可隨時撫平他們既怕死又想去日本血拼的矛盾心態，於是勉為其難找着我這位村姑，希望從中捉到一兩句啱聽管用的說話，勉強支持他們再戰日本的理由。
不怕死是騙你的，但我關心日圓匯價持續高企的問題，多過關心東京的輻射指數；擔心東京酒店房價幾時取消優惠，多過擔心大地震再次來臨的日子。自己並非特別藝高人膽大，也非盲目崇日對日本充滿無限信心和寄望，但至少我知道，跟生活在這片土地上的一億二千多萬日本人相比，我有甚麼資格去擔心咁多嘢？
生死有命，出街都會有機會給自尋短見的飛將軍活生生壓死，所以旅行應該叫自己放鬆心情，盡情享受。如果老是畏首畏尾，倒不如去幾轉日本用品店或百貨超市逛逛了事好了。
網址：www.facebook.com/lamwaimei/
寫作人「日本村姑」