換油≠保養 返廠Check車唔慳得

電腦診斷一目了然

大部分歐、日車廠都建議車輛每行駛5,000km，便應返廠進行保養，但跟足指引的車主並唔多，甚至搵坊間車房換吓機油就算。其實咁樣係一種不負責任的行為，林正和指：「換油只是保養的其一部分，只有原廠診斷電腦才可詳細分析車子狀態，及早發現問題繼而進行適當保養或維修，這才是正確態度。」再者，進行定期保養可及早發現潛在問題，避免惡化。有些車主兩、三年都唔返廠做檢查，像原本可以簡單解決的油泵問題，因遲遲不處理，最終搞到波箱冧埋，隨時得不償失。

港車損耗快需密驗

可能有人會問，歐、美地區汽車每行駛10,000km才需要返廠做定期保養，點解香港要Check得咁密？林正和解釋，香港地方冇外國咁大，大部分時間都在市區行駛，經常開車、停車，損耗品折舊速度快，保養自然要密一點，若經常在惡劣行駛條件下使用，便更需要頻密地維修保養。就像智能手機的軟件會不定時更新，行車電腦亦不例外，目的是修正及優化系統。檢查及更新軟件通常都在定期保養時一併進行，返廠保養是不可慳的。

合誠汽車有限公司維修經理林正和強調：「換油不等於保養」。	工具擺放整齊有序，比坊間車房有系統。	汽車定期保養主要有5大項，分別為引擎、傳動系統、制動系統、轉向系統和電器系統的檢查和調校。a. 更換風隔使引擎「呼吸」更暢順，有助發揮性能。

撻車後忌即時開車

定期保養固然重要，駕駛態度亦足以影響汽車耐用度，如啟動引擎後立即開車便是不合適的行為，林正和教路，引擎未得到充分潤滑便開車，機件在運行時很易出現磨損，建議撻車後等１分鐘，待引擎得到機油潤滑才開車。另外，改裝汽車同屬大忌，別說修改電腦軟件、換硬避震，只是換上闊胎已加重轉向系統的負荷，增加耗油。點煙器也不應該插上過多電器，尤其是差劣的產品，電壓不穩或耗電量過大，都可能影響到車內的電器系統運作。

b. 定期更換波箱油，可確保轉波順暢。	c. 假如制動皮已損耗，必須立即更換。	d. 電池電力不足有可能出現不能啟動引擎的情況，需要時可補充電池液或更換電池。

撰文：鄭浩文　

攝影：謝孝祥

鳴謝：合誠汽車