阿諾Show顱 12吋T-800
作為SCI-FI迷，《未來戰士》有難以抵擋嘅魅力，單係一句︰「I'll be back!」已令人再三回味。即使阿諾卸任州長後搞到一身蟻，但其箭豬頭加黑皮褸嘅經典T-800造型，至今仍是很多玩具廠嘅Target。最近Hot Toys就以DX系列之名，推出新版T-800，由服飾至武器都重新改良，最正係今趟可幫佢開腦做手術，等粉絲重演電影嘅經典場面！
舊作大補完
《未來戰士》玩具多如雨後春筍，單係T-800就有半胸像和7吋Figure等，最近1:4 Figure更爆發大戰，繼Enterbay後，連Hot Toys都話今年快將推出。至於12吋Figure，兩年前由大師Yulli操刀嘅頭雕獲得一致好評。既然前作咁成功，為何要翻出呢？Hot Toys主腦Howard表示：「製作舊版時，我們搜羅了大量電影資料作參考，有趣Idea一籮籮；但礙於成本，當時好多念頭都沒有機會發揮。今次納入DX系列重製，正是希望為作品補完。」新版T-800頭雕繼續由Yulli負責，試辦所見，面相更為逼真，只嫌青靚白淨得滯，若飽歷風霜一點會更好。
轉眼系統複雜
貴為DX系列，新版T-800同樣加入P.E.R.S.轉眼系統，惟廠方指出，由於今次採用無頸設計，加上頭蓋骨可揭起，因此放入眼球及控制桿的難度，比以往高出幾倍。說到頭蓋骨可揭起，這經典的Delete Scene電影情節，曾收錄於DVD及Blu-ray內，如今Figure有齊頭皮、電腦晶片及手術鉗等配件，讓Fans可幫佢開腦做手術！值得留意是今次隨盒只跟一款頭雕，跟以往DX系列送2款頭雕不同，莫非廠方想保留爛面Look，留待日後再出戰損版？
新版重裝上場
素體方面，雖然新版沿用之前的包膠Body，但重新執過胸形及手肘雙鉸位後，令手臂可動幅度大增，擺揸槍甫士更加自然。但奇怪的是，舊版T-800可拆下前臂再套入機械手，新版反而不能，可玩性不升反降！幸好服飾造型加番唔少分，皮褸、皮褲全屬真皮，拉鏈、皮扣設計同真衫無異。至於武器，有齊Winchester 1887霰彈槍、M1911曲尺手槍及雷鳴登，而火神炮更重新設計過，並新增旅行袋Full Gear上陣，殺敵話咁易！
售價︰$1,450
預訂價︰$1,400
推出日期︰今年第3季
撰文︰陳志滔
攝影︰方偉堅
查詢電話︰2388 4677