DoCoMo P-05D米奇換殼而出

喺《米奇妙妙屋》卡通入面，想同米奇、米妮等主角見面的話，便要講句咒語「Meeska, Mooska, Mickey Mouse」。現實中，想日日見到佢哋唔使咁麻煩，皆因日本DoCoMo剛與迪士尼合作，推出Disney Mobile主題智能手機P-05D；不但附送兩個超可愛的背殼，更預載大量Disney音樂和Wallpapers等元素，讓你隨時隨地置身童話世界！

採用4.3吋大芒，qHD解像度相當細緻。售價：$5,198

可愛背殼任換

驟眼睇P-05D，很難發現它是一部主題手機，皆因直立式大芒設計，與主流的智能手機分別不大，要細心觀察才發現主頁輕觸鍵及機背加入一個米奇剪影Logo。而且好戲在「後」頭，隨機附送兩款主題背殼，黑色主機附有Mickey & Minnie大頭圖示和Minnie紅色波點機殼；而今次由水路到港的白色主機，則附送Minnie黑白橫間，以及Donald & Daisy粉紅色機殼，簡單將機殼扣於機背即可變身成夢幻手機！

夢幻專屬內容

單靠主題機殼，當然滿足唔到一眾粉絲，所以廠方加入大量迪士尼內容，包括米奇時鐘Widget、互動Live Wallpaper、卡通功能表等，更提供以米奇為主題的音樂，畀各位設定成來電及提示鈴聲，感覺好似去咗迪士尼樂園一樣！除此之外，新機亦預載大量主題Apps如《Disney Photo》、《Disney Cinema》等，不過這些Apps要日本DoCoMo用家先玩到，較為可惜。

附送換卡器，方便更換microSIM卡。

7.8mm夠晒薄，而且只重103g，Smartphone中實屬輕巧。

隨白色主機附送的Donald & Daisy（左）及Minnie（右）機殼，襯到絕！

隨白色主機附送的Donald & Daisy（左）及Minnie（右）機殼，襯到絕！

7.8mm激薄設計

以往不少主題手機都着重設計而忽略機能，新機卻一反傳統，打造成一部強勁的智能手機，內置1GHz雙核心處理器、1GB RAM及820萬像素鏡頭，配合4.3吋qHD屏幕，對比度和可視角度不俗，最啱用來影相和睇片。新機另一賣點是支援IPX5/7防水標準，加上只厚7.8mm，重量為103g，輕身便攜，女Fans實冇投訴！有讚當然有彈，由於機身採用一體成形設計，在不能加插記憶卡的情況下，擺Apps、存相只能靠內置16GB容量，睇嚟各位要就住用啦！