遊清水放風箏環保Serena Green結伴行

星期日放假冇嘢好做，又唔想出街同人逼，不如同屋企人去郊外玩番餐，齊齊呼吸新鮮空氣，翌日返工都精神啲啦！位於新界東的清水灣郊野公園，周邊配套非常完善，除設有燒烤場和放風箏場外，停車場旁邊還是龍蝦灣郊遊徑的起點，無論大人細路都足以消磨整個星期天。

售價：$292,800

遠足郊遊徑

香港不少郊野公園都遠離市區，交通較為不便，如果全家人出去玩，有部MPV會方便好多，例如今次借來拍攝的日產（Nissan）Serena Green Highway Star，便擁有特大車廂和8個座位，很適合大家庭使用。

揸車去清水灣郊野公園很簡單，只要沿清水灣道駛至大坑墩即可，到達後只要駕入公眾停車場，便有20多個私家車位供免費使用。清水灣一帶常有強勁清風，是本港著名的放風箏熱點，即場買了一隻膠風箏試玩，一放手便被強風吹上數十米上空，如此強風，相信連3歲小朋友都玩得掂！鍾意行山遠足的朋友，可到龍蝦灣郊遊徑走一轉，入口就在停車場旁邊，全長只有2.3km，不費1小時便能走畢全程。惟注意雖然難度不高，但上山一段仍然頗為費力，而且大部分路段都是崎嶇山徑，為安全起見，最好結伴同遊。

清水灣常有強風，是放風箏的理想去處。

園內設有大型燒烤場，環境相當優美！

遊客中心內有海岸特徵、海岸常見植物等展品，逢星期二休息。

耗油低極環保

每個人到郊外都想呼吸新鮮空氣，若自問座駕勁多黑煙，就唔好去搞破壞喇！Nissan Serena Green是其中一款獲政府認可的環保汽油私家車，除可享稅務寬減外，更有低耗油和低排放的特點。廠方指，根據日本10.15模式測試，搭載2公升直四引擎、擁有147ps馬力和21.4kgm扭力的Serena Green Highway Star，平均油耗低至15.4km/L，配合Xtronic CVT波箱和智能停車熄匙系統（Idling Stop System），要做到$1.2/km並非難事。

A柱下方設有三角窗，有效減少盲點位。

中、後排都有闊落空間，乘坐感舒適。

車頂設有巨型天幕，後排乘客都可享開揚靚景。

空間闊易上落

今代Serena的車廂比上代明顯闊落不少，前、中、後三排都提供了寬敞的乘坐空間，即使後排坐上3名成年人，都不會有侷促感覺。此外，整排後座可向兩側摺疊起來，騰出的額外空間足以擺放遙控飛機、浮床等大型物品；論實用性，一般三廂式私家車實在無法比擬。目前，市面上大多數MPV都配備雙電趟門，Serena Green Highway Star也不例外，而且較對手多走一步，加入了「One Touch」一觸式自動雙趟門設計，只要輕按門柄上的按鍵，車門即會自動開閂，毋須拉動手把，咁就算抱住小朋友都可輕鬆上落啦！