遇伯樂突破形象 林莉花蝴蝶蛻變

感覺乖巧的林莉（Carrie），曾數度獲得Noel為她設計戰衣，包括Carrie在韓國領取Model Star Award時的性感晚裝，還有在澳門出席內衣品牌Victoria's Secret開幕活動的優雅長裙，Noel的服裝不但保留Carrie獨有的高雅氣質，同時亦發掘了她的可塑性，遇上這位伯樂，Carrie說：「做model唔應該局限自己，啱啱開始時自己個style會比較女仔，有個框框住自己，但原來自己可以咁唔同，我曾經試過着咗一套特別嘅衫，好多朋友都唔信嗰個係我，話我唔只係個樣，就連眼神都唔同咗，初初問佢哋咁樣好唔好？佢哋話做artist就唔好，但做model就係好事。」

要做本土名模

Carrie既然擁有當模特兒的潛質，自然愈來愈enjoy做model，她說：「因為我生得高，好多人以為我係內地女仔，其實我係土生土長，我想證明本地女仔都可以做出名模水平！呢行要有人識唔難，但點可以一路行落去，就要keep住努力！」

林莉事業上屢有突破，早前就遠赴台灣為演唱會任跳舞嘉賓。	林莉與Noel合作無間，彼此惺惺相惜。	林莉渴望穿着優雅浪漫的婚紗出嫁。

銳意在模界幹一番事業的Carrie，雖已屆適婚年齡，但要專注工作只好將拍拖計劃擱置，她無奈表示：「呢個moment惟有專注工作啦，我性格係憑感覺，會好全情投入一段感情，我絕對係一個好太太，好媽媽，本身四兄弟姊妹，會習慣照顧人，細個諗結婚之後唔做嘢，依家有少少轉變，婚後都會keep住做，好似琦琦同Janet Ma（馬詩慧）咁，有自己頭家，但愈嚟愈成熟有智慧。」

貼合主題的粉紅色蝴蝶結服裝。	曾與經理人Bolie（右）傳出緋聞的林莉，澄清現時感情狀況是單身。	林莉在韓國領取Model Star Award時穿着的性感晚裝，凸顯了她的苗條身材。

憧憬浪漫婚禮

倘若將來結婚，心目中的嫁衣又會是甚麼模樣？Carrie頓時變回小女孩，憧憬地說：「我鍾意着簡單優雅嘅婚紗，我幻想到婚禮係一個神聖莊嚴嘅畫面，可能裙襬要長啲，成個感覺出嚟要浪漫。」

擁高雅氣質的林莉，要突破過去的乖巧形象，在模界幹一番事業。	設計師都有自己一套理念，不過Noel亦會當聆聽者。	Noel為林莉打造多變形象。

身為模特兒，自然要有穿衣之道，但Carrie自言不會干涉另一半的穿衣風格：「第時男友或老公，我都唔會理佢着咩衫，free style就得，最緊要佢舒服，唔係一定要跟潮流。」當然，花蝴蝶亦可擁有平凡愛情！

Noel Chu追求細心

Noel Chu是本地時裝設計師，專門設計晚裝和婚紗，未來還會做訂製服，問到Noel的設計理念，她說：「我追求嘅係細心，本身性格都係咁，設計上所有嘢可能好簡單，但又會有少少signature嘢，咁樣款式先會歷久常新。」

常聽說設計師很有個性，只會遵守自己的一套，如果遇到堅持己見的客人，Noel會選擇當聆聽者：「會聽佢意見，佢搵得我就會有佢原因，但我都會盡量用番自己設計概念，覺得唔好會同佢講，我都有自己一套標準，好似有位50幾歲嘅女客人，我覺得佢keep得好好，我就坦白同佢講乜嘢適合佢。」

合作有默契

Carrie透露每次跟Noel合作都很順利，第一次合作已感受到雙方的默契，她說：「我哋好夾，好欣賞大家，佢又好鍾意我特質，好似出席乳癌基金活動嗰次，佢幫我設計嘅粉紅色衫，好似好簡單，但細味睇真啲，其實好有心思。」此時Noel就表示是次設計是一項特別嘗試：「好似當中嘅粉紅色蝴蝶結，就會貼合番主題。」可見兩位合作愉快！

採訪：李惠儀

攝影：沈健程

服裝：Noel Chu

場地：Noel Chu Wedding Workshop