香港仔魚蛋名店「山窿謝記」日前突然宣布下月底結業，據講因為近年香港鮮魚產量大減，加上內地魚太貴，成本急升，又找不到接班人，無奈結束60多年老字號，亦不考慮將字號轉手他人，怕做壞招牌。不知道老字號會否待魚價回落重出江湖，不過短期內無論如何都要食一趟！
消息震驚香港食壇，一眾食客無不慨嘆惋惜。得悉「噩耗」，即刻打電話畀老闆娘，果然不出所料，她謂自消息傳出，區內街坊各方好友老饕紛紛湧至，吳君如亦於日前到來。其實小店平日門外也現人龍，日前人龍更墟冚，外賣招牌魚蛋炸魚片未到兩點已告沽清，即使排餐飽，都惟有明天請早。老闆們昨天更決定取消外賣，估計堂食會更多人！
山窿謝記名物多籮籮，炸魚蛋、炸魚片、魚皮、魚紮都是搶手貨，據記者幾天來朝聖「經驗」，現在每天頭號沽清的是炸魚蛋，第2位是炸魚片，第3位是炸魚皮。畀個貼士你，點菜時記得多口問句阿姐有無魚紮，因為據講魚紮已停賣幾個月，說不定臨別秋波會再度登場！仲有仲有，記得買樽辣油返屋企！
多麗斯：好在行得快，差啲喊出嚟，點解要執笠呀？？？
卡西哥：我係九龍人，呢間嘢究竟有幾巴閉？><
多麗斯：60年老字號，魚蛋堅持以鮮魚自家每天手打，炸魚蛋同魚片金黃香口，外表雖有點皺皮，咬落好彈牙，又有魚味。老闆話依家無靚魚寧願唔做。 :(
萬利雅：早幾日外賣兩點幾就賣晒！我嗰日仲撞到吳君如添！其實點解叫山窿呢？
卡西哥：點只吳君如，以前劉嘉玲同好多達官貴人都幫襯過。
陳 皮：聽講謝記以前賣魚蛋起家，擺檔的地方狹窄似山窿，所以叫做「山窿謝記」囉。
卡西哥：睇嚟下星期一要請半日假，拉大隊去食碗魚蛋粉，緬懷緬懷！
撰文：李文雅、許政