韓國石板燒窩心熱燙

見證韓菜潮流

韓國小店多以韓國「阿豬媽」主理掛帥，木槿的主廚陳師傅雖是香港人，但就在韓國餐廳工作20多年，開店時不跟風賣傳統燒肉和麵食，反而推出香港少見的石板燒，大受歡迎，晚晚排長龍！有先見之明，皆因他在過往工作中了解到香港人對韓菜的要求：既要傳統濃香口味，又要吃得健康放心。所以他的韓國菜，會跟足傳統，韓國菜的靈魂像人參、辣醬、甜醬和豉油等，都從當地入口；煮餸熬湯的湯底和醃醬亦依足韓國人配方，不多不少，味道有幾正宗不用多說。他更加入不少健康元素，像豉油以多種天然材料自家製，少鹽無味精，夠味之餘又健康；而菜式也加入部分香口卻少油的選擇，石板燒便是主打。

生拌牛肉 $56 生牛肉加入生雞蛋、蒜、即切雪梨絲和麻油拌勻，牛香果香蒜香蛋香百味紛陳，好開胃。	炆牛肋骨煲 $70 沿用韓國傳統的炆法，以紅棗、老抽、糖及韓國豉油做醬炆6小時，牛肋骨入口鬆化腍滑，盡收醬汁精華，與當地吃到的沒兩樣。	辣醬炒年糕 $42 用師傅親自磨製的韓國乾辣椒粉，再加入韓國入口的甜醬和辣醬炒年糕，惹味彈牙，略嫌過辣。

原個石板上枱

石板燒是以一塊燒熱的特製石板來烤肉，陳師傅謂不少客人因不懂掌握火候而勁加油，甚至將肉燒焦。為了大家吃到美味燒肉，又享受到動手燒的樂趣，他在廚房先以石板將牛肉燒至7成熟，將肉香肉味加肉汁封鎖，再連石板上桌，此時石板仍保持在攝氏90度高溫，在降溫的過程中客人再將牛肉烤至全熟，如此有得玩，生熟度又剛好，一舉兩得，師傅果然夠細心！

人參雞湯 $66 用新鮮雞、紅棗、韓國人參、蒜頭等熬足4小時，上桌前再加入半隻雞來煲。藥材味好郁香，甘甘的，呷一口湯，整個人立刻熱血沸騰。

店中裝潢樸實不花巧，但坐得舒適，而且落地大玻璃引來一室日光，好開揚。

不斷創新

除了招牌石板燒，翻翻餐牌，亦有大把選擇，韓國傳統菜應有盡有，既有屋企菜如蛋包蝦、豆腐湯煲、炒粉絲等，亦有經典的牛尾煲、牛腸牛肚大火鍋、炆牛肋骨煲等，陳師傅還會把每道菜的柯打次數記錄下來，定期把不受歡迎的剔走，並加入新菜式。他更會經常瀏覽各大網站，搜羅韓菜新食譜，為捧場客送上新口味。走進來，在韓流中，我感受到師傅一顆熱切的心。

芳芳@紅磡木槿激愛石板燒！ 50人讚好！

摩登人：上次食完韓燒件衫好大陣油煙味，而且好油膩，超級滯……[~_~]"

芳 芳：咁不如試吓石板燒啦！香港食石板燒的餐廳唔多，但最近紅磡開咗間喎！^^

陳 皮：掂喎！我哋都只係執師傅手尾繼續興熟啲肉，乾手淨腳，無油煙無油味又唔怕彈油，正呀。:p

食肉精：但啲肉正唔正先?

陳 皮：掂！唔使$70就可歎燒肉，但食到新西蘭和加拿大靚牛。仲有時令鮮雞、羊、豬選擇，絕無將貨就價！Hehe XDDD

大姐賢：老闆仲話辣椒粉係自己用韓國乾辣椒磨出來，辣味更突出喎！一於來個另類韓燒啦！

摩登人：咁扑錘啦！訂位囉訂位再去囉！！

芳芳：要Walk In！我哋早啲去排隊啦，GO！

撰文：許政

攝影：張群生

地址：紅磡寶其利街47號地舖

查詢電話：2773 9728