談情葉念琛Anjaylia
近年香港愛情電影的代表人物是誰？肯定非葉念琛莫屬，一年最少拍兩、三部愛情片，講中唔少港男港女心聲。而葉念琛今年玩突破，於情人節期間公映首套愛情微劇場，更找來Anjaylia做女主角，由今日起一連7天冧盡各位有情人，正如其宣傳金句「愛過好過錯過，愛錯學懂放過」！70後愛情大導遇上90後純情女模，談「情」又會有幾冧呢？
第一問：拍愛情微劇場有難度嗎？
葉念琛自評佢所拍的愛情電影係私房菜，唔係大酒樓、連鎖餐廳，主要做熟客仔生意，而今次拍微劇場似做緊私房甜品，同主菜唔同，「90分鐘電影唔一定代表難拍，今次3分鐘1集的網劇亦唔代表易拍，要在3分鐘拍完一個古仔，係對自己的挑戰。」導演今次主理的甜品，明顯冇咁雕花，拍攝手法、攝影技巧都較簡單，講一個女孩從戀愛中成長的故事；選角上亦起用了之前合作過兩套電影的Anjaylia。
第二問：Anjaylia拍得到愛情電影嗎？
訪問間，葉念琛三番四次取笑Anjaylia「未拍過拖」，今次要Anjaylia擔正愛情微電影主角，會唔會好有難度？只見網劇預告片中，Anjaylia扮可愛冧人又得，扮歇斯底里喪喊又得，連導演都話這位新女主角表現唔錯，「拍戲好講Talent，她的特點係表現穩定，由情緒到角色拿捏，都畀到我驚喜。我用演員有個慣常做法，就係某個時期會用同一個班底，如初期小方、Stephy，在電影與電影之間可以睇到佢哋成長，所以我今次畀多啲戲份Anjaylia發揮！」
第三問：點睇今日的戀愛態度？
今時今日，o靚仔o靚妹的戀愛態度都幾似導演的金句「夫妻如衣服，唔換唔舒服」，但生於70後的導演，話現時溝通方法太多，唔使出門口都可以識女仔，同女朋友食飯時可以同第二個WhatsApp。90後的Anjaylia又點睇？「我係一個特別的例子，中學時見過其他同學一腳搭幾船，但我自己就冇膽試！」而說到擇偶條件，未拍過拖的Anjaylia會否特別挑剔？「唔一定要靚仔，但感覺要舒服，乾乾淨淨咁……最緊要有Feel，就算符合唔到其他條件都唔緊要，愛情要嚟就嚟啦。」
追開葉念琛電影都知道，佢係愛情金句王，但點樣先度到咁多金句呢？導演解畫話佢除了拍電影，又寫專欄，又做電台，又拍網劇，生活空間大，自然可以從自己同朋友的經歷，發掘出金句！
《關於愛情的7件事》簡介
葉念琛首次跟Yahoo!合作執導的網劇《關於愛情的7件事》，以3分鐘為一集，今日起（2月8日）一連7天播放，大結局會於2月14日情人節揭盅。整套網劇圍繞阿寶（Anjaylia飾）發展，由男友Ben（莊冬昕飾）提出分手開始，7集內經歷愛情的7個失戀必經階段「震驚」、「拒絕接受」、「懷疑」、「憎恨」、「回憶」、「寬恕」同「希望」，最後會點？追埋大結局自然一清二楚。
雖然導演話這個網劇，金句唔會似大電影出現得咁頻密，但大家可發揮創意，創造自己的愛情金句，參加網劇金句比賽，3位得獎者更可獲得Cova餐飲券同情人撐枱腳！
葉念琛7大愛情金句
無論係「隨口噏，當秘笈」抑或令人感同身受，愛情金句從來是「葉念琛電影」的命脈，如新網劇就度出金句「愛過好過錯過，愛錯學懂放過」，以下7句經典金句大家又有幾深印象呢？
1. 「想愛一個人，卻愛多一個人。」《獨家試愛》
2. 「愛盡每個人，傷盡每個心。」《十分愛》
3. 「情場如戰場，要愛就要搶。」《我的最愛》
4. 「夫妻如衣服，唔換唔舒服。」《人約離婚後》
5. 「大膽去愛，小心地偷。」《人約離婚後》
6. 「我就好似電腦裏面嘅我的最愛，永遠都有好多，鍾意就Keep，唔鍾意就Delete。」《我的最愛》
7. 「十個男人九個去滾，仲有一個仲諗緊。」《婚前試愛》
7大必殺愛情橋段
葉念琛執導過12部愛情電影，拍攝「現代愛情故事」可謂手到拿來，要考佢必殺愛情橋段絕冇難度。但導演話創作唔好太貪心，用齊所有元素未必最好，總之講到個完整故事感動人已經好好。
1.分手 「尤其係大時代下分手，或者戰爭中的生離死別都好感動，但香港好難有咁嘅條件，好似《北非諜影》男主角，為成全心愛的女人而離開，好浪漫。」
2.暗戀 「默默在背後付出，又唔知可唔可以同暗戀對象一齊，有口難言，有苦自己知，好多人都會有共鳴。」
3.追求 「精誠所至，金石為開。好似日劇《101次求婚》，醜男盡力為博女神歡心，夠晒蕩氣迴腸。」
4.人鬼 「如電影《鬼新娘》、《借屍還魂》入面，人鬼殊途根本冇可能喺一齊，好淒美。」
5.分離 「《秋天的童話》中，十三妹離開船頭尺都令唔少觀眾流過眼淚。」
6.初戀「第一次戀愛，第一次拖手，第一次Kiss，第一次發生關係，好易產生共鳴。」
7.生死 「唔使多解釋，好似經典電影《人鬼情未了》、《鐵達尼號》，生離死別，有難以言明的遺憾。」
撰文：布偉倫
攝影（人物）：林資凱
服裝：:CHOCOOLATE＠I.T（Anjaylia）